Oral qalasyndaǵy bes mektepke oqýshylar tasymalyna sý jańa avtobýstar berildi. Balalarǵa arnalǵan kólikterdiń kiltin Oral qalasynyń ákimi Mırjan Satqanov saltanatty túrde tabys etti.
Avtobýstar Memleket basshysy Qasym-Jomart Toqaevtyń tapsyrmasy negizinde Oqý-aǵartý mınıstrligi Balalardyń quqyqtaryn qorǵaý komıtetiniń bastamasymen alynǵan.
Qala basshysy oqýshylar qaýipsizdigin qamtamasyz etý úshin bilim berý uıymdarynda avtobýs parkin jańartý isine erekshe nazar aýdarylyp otyrǵanyn aıtty.
– Qazirgi ýaqytta qaladaǵy barlyq mektepte qaýipsizdik máselesi qatań baqylaýǵa alynǵan. Mektep ǵımarattaryna beınebaqylaý júıesin ornatý, dabyl túımesin jedel basqarý ortalyǵyna baılanystyrý, týrnıkettermen jabdyqtaý jumysy tolyq atqaryldy. Qala mektepterinde qazirgi ýaqytta 60 myńdaı oqýshy bilim alady. Olardyń 2700-i mektepke tasymal arqyly qatynaıdy. Osy oqýshylardyń mektepke kúndelikti baryp-qaıtýyn sapaly uıymdastyrý jáne mektep ıeligindegi avtokólikterdi jańartý máselesi biraz jyldan beri ózekti bolatyn. Byltyrdan bastap respýblıkalyq bıýdjetten qarjy bólinip, mektepterdiń avtobýs parkin jańartýǵa múmkindik týdy. Osyndaı ıgi isterimiz jalǵasyn taba bersin, – dedi Mırjan Munaıdaruly mektep dırektorlaryna jańa avtobýs kiltin tabystaý saltanatynda.
Jańa kólikke ıe bolǵan bilim ordasynyń biri – Álııa Moldaǵulova atyndaǵy №38 mektep-lıseıi ata-analar komıtetiniń tóraǵasy Qanat Imanǵalıev ata-analar men mektep ujymdary atynan memleket qamqorlyǵy úshin alǵys aıtty.
Jańa avtobýstar Oral qalasyndaǵy №12, 14, 20, 32 jáne 38 mektepterge berildi. Bul kólikterde bala qaýipsizdigine erekshe kóńil bólingen. Qaýipsizdik belbeýi, sómkelerge arnalǵan sóreler, beınebaqylaý kamerasy bar. Taǵy bir ereksheligi – avtobýs esigi jabylmaı turyp ornynan qozǵalmaıdy. Qozǵalys jyldamdyǵy – 60 km/saǵ. Munyń bári balanyń qaýipsizdigine kepil bolary anyq.
Batys Qazaqstan oblysy