Júregi eki ret toqtap qalǵan bala

Sońy qaıǵyǵa ulasa jazdaǵan bul oqıǵa Almatyda oryn aldy. 10 jasar Dastan taýshymyldyq gúliniń spırttik tunbasyn sýmen shatastyryp iship qoıǵan. Sálden keıin balanyń densaýlyǵy nasharlap, esinen ta­nyp qalady. Jedel járdem brıgadasy naý­qasty Balalar jedel medısına­lyq járdem ortalyǵyna jetkizedi. Bas­tapqyda balanyń ata-anasy onyń tunba iship qoıǵanyn bilmegendikten, taǵamnan ýlanǵan dep boljap, naqty dıagnoz qoıý qıynǵa soqqan. О́ıtkeni bala buryn eshqashan dári-dármek pen taǵam allergııasynan zardap shekpegen.

«Bizge bala III dárejeli ekzoýytty shok saldarynan óte aýyr jaǵdaı­da tústi, qandaǵy glıýkoza 18 mmol/l deıin joǵarylap, gıperglıkemııa, ketoasıdoz, bas mı isinýi, jalpy ıntoksıkasııa belgileri baı­qalyp, es-tússiz halde tústi. Sol kezdiń ózinde mıy komada boldy. Qabyldaý bóliminde naýqasty kópbeıindi dárigerler brı­gadasy tekserip, shuǵyl túrde klı­nıkalyq jáne zerthanalyq zertteýler júrgizildi. Taýshymyldyq tun­ba­symen jedel ýlanǵan degen dıagnoz qoıyldy. Aýyr dáreje. III dárejeli ekzoýytty shok. Ýytty ensefalopatııa. Ýytty gepatıt. Naýqas jansaqtaý bó­limine jatqyzyldy, jeke dárigerlik jáne medbıkelik post taǵaıyndaldy. Jaǵdaıynyń aýyrlyǵyna baılanysty naýqastyń júregi eki ret toqtap qalǵan. Dárigerler balanyń jaǵdaıyn turaqtandyrýǵa qol jetkizdi», deıdi Balalar jedel medısınalyq járdem ortalyǵy toksıkologııa bóliminiń meń­gerýshisi Qurmetbek Toqtar.

Osy arpalyspen 10 kúnniń ishinde Balalar jedel járdem dárigerleri balany ómirge qaıtaryp aldy. Balanyń beti beri qarap, aǵzasy qalpyna keldi.

«10-bólimsheniń medısına qyz­met­­­kerlerine, ásirese Qurmet­bek Toqtar­ulyna, sonymen bir­ge jan­saq­taý bólimshesiniń qyzmet­ker­le­rine, M.Ma­qul­­bekov, T.Bı­daı­baı, A.Rıgı, A.Ku­lym­betov, nevropatolog N.Qur­manbaevqa alǵys bildiremin. Jankeshti eńbek­tiń, joǵary kásibılik, qaıyrymdy­lyq, sapaly medısınalyq kómek kórsetýge degen umtylystyń arqa­synda júregi eki ret toqtap qalǵan, bir táýlikten astam ýaqyt komada bolǵan ulym aman qaldy. Endi mine, aman-esen úıge shyqqaly jatyr­myz, barlyq medısınalyq sarap­tamalar jaqsy nátıje berdi. Kásibı mamandardy tańdap, jumys­ty durys uıymdastyra bilgen Bala­lar jedel medısınalyq járdem orta­lyǵynyń búkil ujymyna kóp rahmet», dep, Ortalyq dárigerlerine shyn júrekten alǵysyn jaýdyryp otyrǵan ananyń jaı-kúıin túsinýge bolady.

Al dárigerler azyq-túlik qaýip­sizdigin qatań saqtaýdy, dári-dármek pen bala densaýlyǵyna qaýipti zattar­dy qol jetpeıtin jerde saqtaýdy su­raıdy. Jaz – konservi men marınad jasaı­tyn qysqa daıyndyq maýsymy bol­ǵandyqtan, bul kezde sirke sýy sııaq­ty, basqa da qaýipti zattarmen ýlaný yqtımaldylyǵy arta túsedi.

ALMATY