Semeı qalasynda Abaı oblysynyń qurylǵanyna bir jyl tolýy qurmetine 50 jáne 63 jastaǵylar arasynda memlekettik qyzmet ardagerleriniń bılıard sportynan HHIH halyqaralyq týrnıri bolyp ótti. Oǵan 30 komanda jáne 225 bılıard oıynynyń sheberleri qatysyp, birneshe kún boıy kúsh synasty.
Aldyn ala aıta keteıik, sıqyrly taıaq sheberleri syn sátte uıymshyldyq tanytyp, óńirdegi tabıǵat apatynan zardap shekkenderge 600 myń teńgeden astam kómek kórsetti. Sádibek Túgel basqaratyn «Álem qyrandary» birlestigi men týrnırdi uıymdastyrý komıtetiniń tóraǵasy Sátbek Raqyshev jigerlilik pen qaıtpas qaısarlyqtyń úlgisin kórsetken semeılik órt sóndirýshiler men oblys turǵyndaryna rızashylyqtaryn bildirdi.
Birneshe topqa bólinip, óner kórsetken bılıard sport sheberleriniń ónerin tamashalaýǵa kelgender «Abaı arena» jabyq sport keshenin lyq toltyrdy. Komandalyq esepte «Astana qyrandary-1» komandasy bas júlde jáne 1 mıllıon teńgeniń sertıfıkatyn jeńip aldy. Ekinshi jáne úshinshi oryndardy Shymkenttiń «Turan», Shyǵys Qazaqstan oblysynyń «Asaý Ertis» komandalary ıelendi. Olar tıisinshe 700 myń jáne 400 myń teńge syıaqy men Abaı oblysy ákiminiń Alǵys hatyna ıe boldy.
50 jastaǵylar arasynda M.Karbaev, E.Tynysbaev, V.Pınıgın alǵashqy úshtikti túıindedi. Al 63 jastaǵylar arasynda K.Zekenov, N.Ryjıh, V.Pylev júldeli oryndardy ózara bólisti.
Ońdasyn ELÝBAI,
«Qazaqstannyń qurmetti sport qaıratkeri»
SEMEI