Túlekterge – aq jol!

«Búgin ata-ana úshin baýyr eti – balanyń úlken ómirge qanat qaqqan, ustaz úshin shákirtteriniń bıikten kóringen qýanyshty kúni. Bilimdi de daryndy jastary­myz qurylǵanyna bir jyl tolǵan óńirimizdiń keleshekte gúl­dep, kórkeıýine orasan zor úles qo­saryna senimimiz mol. Eli­miz úshin daryndy jastar – basty qundylyq. Halqymyzdy jar­qyn bolashaqqa jeteleıtin de, jetkizetin de ózderińiz. Oblys jurtshylyǵynyń 84 paıyzy aýyldyq jerlerde turady. Iаǵnı sizder aýyl mektepterinde oqyp júrip te tereń bilim, tálimdi tárbıe alýdyń aıqyn úlgisin kórsetip otyrsyzdar. Aldaǵy ýaqytta elimizdiń, sheteldiń joǵary oqý oryndaryna túsip, qalaǵan mamandyqtaryńyzdy meńgergen soń osy otyrǵan árbi­rińizdiń týǵan jerge tý tigip, eli­mizdiń áleýmettik-ekonomıkalyq damýyna, óńirdiń órkendeýine atsalysady degen oıdamyn. Siz­der mamandyq ıesi bolyp oral­ǵansha oblysymyzda kóptegen jarqyn jobalar júzege asyp, irgesi qalanady. Sol kezde ǵa­lym­dar, ekonomıster, qar­jy­gerler, saıasatkerler, ınjenerler, mu­ǵalimder men dárigerler qajet bolady. Úkimettiń qoldaýymen Qonaev qalasynan akademııalyq qalashyq salý josparlanyp otyr. Jastardy qoldaýda, olardyń turmystyq ahýalyn jaq­sartýda zamanaýı turǵyn úı­ler boı kóterip, qalamyzdyń irgesi keńeıedi. Jańa jumys oryndary kóbeıedi. Sondyqtan Alataýdaı asqaq armandaryńyz oryndalyp, dúnıege bir kirpish bolyp qalanýlaryńyzǵa tilek­tespin»,  degen oblys ákimi sal­tanatty shara barysynda mek­tepti «Altyn belgige» aıaqta­ǵan túlekterdiń ata-analaryna rızashylyǵyn bildirip, Alǵys hattar tabys etti.

Ásem ánmen kómkerilgen saltanatty shara sońynda túlek­ter­ge Qonaev qalasynyń bas jos­parynyń maketi tanystyryldy.

Osy tusta aıtar bolsaq, oblys ákiminiń qoldaýymen óńirde bilim salasynda kóptegen ıgi is pen joba júzege asy­rylyp jatyr. Mysalǵa aıtar bolsaq, bilim sapasyn arttyryp, bilimdi jastar áleýetin kóterýdi maqsat etken óńir basshysy qaıtarymdy ınvestısııa retinde salaǵa bólinetin qarjy kólemin ulǵaıtqan. Bilim sapasyn kóterý maqsatynda «50 mektep» jobasyn qarjylandyryp, «Bilim-ınnovasııa» lıseıleriniń tájirıbesin oblystyń 50 mekte­bine endirýdi bastaǵan. Osy joba aıasynda daryndy 50 oqýshy 35 kún Astana qalasynda tegin olım­pıadalyq daıyndyq kýrstarynan ótedi.

Sonymen qatar ótken jyly ulttyq biryńǵaı testileýden jo­ǵary ball jınap, biraq memle­kettik grantqa iline almaǵan, aqyly oqýǵa múmkindigi joq, ob­lys­taǵy az qamtamasyz etilgen otbasy balalaryna ákimdik tarapynan qajetti mamandyqtarǵa 100 grant bólinip, joǵary oqý oryndarynda bilim alyp jatyr. Bıyl jergilikti bıýdjet esebinen pedagogıkalyq, medı­sınalyq, aýyl­sharýashylyq maman­dyq­taryna 100 grant bólingen.

«Biz árqashan jastarǵa qoldaý kórsetýge daıynbyz», degen oblys ákimi Balqash aýda­ny turǵyndarymen kezdesýi barysynda balalaryn oqyta almaı otyrǵanyn aıtqan 2 ananyń ótinishin birden qarastyryp, atalǵan balalarǵa grant taǵaıyn­dalyp, óńir bıýdjetinen qarjy bólingendigin ataý artyq etpes. Negizinen oblys ákimdiginiń granttary tek bakalavrıatqa ǵa­na bólinip kelse, byltyrdan bastap ınternatýraǵa da bólýdi qarastyra bastaǵan. Nátıjesinde, Talǵar men Qonaev qalalarynan medısınalyq mamandyqtyń bakalavrıat deńgeıin úzdik bitirgen 2 túlekke ınternatýrada bilim alýǵa ákimdik grant bólip, qoldaý bildirdi.

Almaty oblysy