Almaty qalasy Kásipkerler palatasy janyndaǵy jumys toby eki apta boıy taksı qyzmetiniń qunyna taldaý júrgizip, bir baǵyttaǵy jol júrýdiń ortasha qunyn 6 myńnan 8 myń teńgege deıin bolýy kerek degen sheshimge keldi. Eger taksı qyzmeti premıým segment bolsa tarıfti 12 myń teńgege deıin kóterýge múmkindik bar. Bul sheshim baǵany yńǵaıyna baǵyndyryp alǵysy keletinderdiń tábetin tejeıdi degen úmit bar.
Elimizde taksı men onyń júrgizýshileriniń qyzmeti arnaıy erejemen bekitilgeni belgili. Osy qujat boıynsha taksı júrgizýshileri eń aldymen jeke kásipker retinde tirkelýi, jolaýshy tasymalymen aınalysatyny týraly sáıkestik qujaty bolýy, kólikterin taksı belgisimen jabdyqtap, júrgizýshiler arnaıy kıim úlgilerin kııýge mindetti edi. Sondaı-aq kólik salonynda jolaýshylardyń kóz aldynda júrgizýshiniń fotosýreti, aty-jóni kórsetilgen vızıt kartochkasy, tasymaldaýshynyń resmı ataýy, onyń mekenjaıy men telefon nómiri kórsetilgen aqparattyq taqta bolýyn da osy ereje mindetteıdi.
«Atameken» UKP basqarýshy dırektorynyń orynbasary Álisher Tursynnyń aıtýynsha, naryqtyń osy segmentinde otandyq taksı qyzmetiniń basymdyqta bolýy mańyzdy. «Monıtorıng barysynda qarbalas ýaqytta baǵanyń 6000 teńgeden 8000 teńgege deıin aýytqyp turatynyn anyqtadyq. Qazir naryqta dástúrli kólik túrinen bólek elektrokarlar da bar. Olardyń Almaty áýejaıynan Shymbulaqqa deıingi jolaqysy 12 myń teńge dep belgilendi», deıdi sarapshy.
Bul baǵanyń da turaqty baǵa emes ekeni jıyn barysynda belgili boldy. Jolaýshylar úshin usynylatyn baǵa quny aýa raıyna, suranysqa jáne basqa da derekterge baılanysty ózgerýi múmkin. Almaty áýejaıynda túrli baǵytqa baǵa shamasy týraly qazaq, orys, aǵylshyn jáne qytaı tilderinde arnaıy bannerler ornatyldy. Týrıster qosymshany QR kodtary arqyly júkteı alady. «Baǵa 12 myń teńgeden aspaýy úshin sheteldik týrıster baǵa dıapazondary týraly habardar bolýy mańyzdy. Sheteldik týrıst úshin shamamen marshrýt jasadyq. Qalany, sondaı-aq osyndaı oryndarǵa bannerler qoıýdy, «Bannerde úsh otandyq jáne eki sheteldik taksı qyzmetin kórsetedi. Sheteldik qyzmetterdiń kartografııada jáne ornalasqan jerin anyqtaýda múmkindikteri kóbirek. Bul jaǵynan olar utady. Jumys munymen toqtap qalmaıdy, biz jalǵastyramyz. Tásilderimizdi, jobalarymyzdy jetildirý jáne múddeli organdarmen jumys jasaý», dedi ol.
Á.Tursynnyń aıtýynsha, sheteldik týrısterdiń qalaǵa kelgen boıda qaı baǵytqa basymdyq beretini aldyn ala zertteldi. Mysaly, Medeý nemese Shymbulaq bolsa, sol baǵyttaǵy qonaqúılerge toqtaıdy. Bul rette týrısterdiń Almatydaǵy eń joǵarǵy baǵanyń ortaq kórsetkishi 12 myń teńgeden aspaıtynyn bilýi biz úshin mańyzdy. «Bannerde úsh otandyq jáne eki sheteldik taksı kompanııasy qyzmet kórsetetini aıtylǵan. Sheteldik qyzmetterdiń kartografııada jáne ornalasqan jerin anyqtaýda múmkindikteri kóbirek. Bul jaǵynan olar utady. Jumys munymen toqtap qalmaıdy, biz aldaǵy ýaqytta osy baǵyttaǵy zertteýlerimizdi jetildire beremiz. Naryqtyń zańy bir baǵamen turaqtap qalǵandy qup kórmeıdi. Baǵanyń suranys pen usynystyń deńgeıine qaraı rettelip otyrǵany mańyzdy», dep sózin túıindedi Á.Tursyn.
Almaty áýejaıynyń baspasóz qyzmetiniń jetekshisi Naılıa Jabǵına áýejaıdy habardar etý qyzmeti kelgen jolaýshylarǵa qala boıynsha júrýdiń yqtımal joldary týraly eskertetinin atap ótti. Áýejaı qyzmetkerleri júkti qabyldaý aımaǵynda jáne halyqaralyq kelý zalynan shyǵaberiste kelýshilerge paraqshalar taratady.
«Almaty áýejaıy» AQ bóliminiń bastyǵy Rýslan Qozybaqov osyǵan deıin de baǵa máselesi tóńireginde týyndap jatqan túıtkilderdi retteý úshin birqatar qadamǵa barǵanyn aıtty. Almaty qalasy quqyq qorǵaý oryndarymen baılanys turaqty. Týrıstik polısııa shetelden kelýshilerdi qarsy alyp, túsindirme jumystaryn júrgizedi. Til bilmeıtinderdi polısııa qyzmetkerleri taksıge shyǵaryp salyp, tarıfterdi eskertedi.
Eske salsaq, Almatyda shetel azamattaryn áýejaıdan qonaqúıge deıin 800 dollarǵa jetkizgen taksı júrgizýshisi jazalanǵan edi. Onyń aldynda shetel azamattarynan tasymal qyzmeti úshin qomaqty qarjy alǵan taksı júrgizýshisi bes táýlikke qamalǵan bolatyn.
ALMATY