Buqaralyq aqparat quraldary qyzmetkerleri kúni qarsańynda Qazaqstan Respýblıkasy Prezıdentiniń atynan osy salada qajyrly qyzmet atqaryp kele jatqan qyzmetkerler baspanaly boldy, dep habarlaıdy Egemen.kz.
Kásibı mereke qarsańynda uıymdastyrylǵan saltanatty sharaǵa Prezıdent ákimshiliginiń ókilderi, Aqparat jáne qoǵamdyq damý mınıstri, BAQ basshylary men «Dara» prezıdenttik bastamalar qory men «Halyq» qaıyrymdylyq qorynyń ókilderi, sondaı-aq BAQ qyzmetkerleri qatysty.
«Jýrnalıster kúni tamasha bir tartýmen bastalyp jatyr. Eń áýeli sizderdi kásibı merekelerińizben, baspanaly bolýlaryńyzben shyn júrekten quttyqtaımyn. Memleket basshysy, mınıstrliktiń atynan úlken alǵys bildiremin. Mirjaqyp Dýlatuly atamyzdyń jaqsy bir sózi bar «Kimniń baspasózi myqty bolsa, sol el myqty» degen, qazirgi zamannyń tilimen aıtqanda, kimniń jýrnalısi myqty bolsa, sol ozar. Endi qudaıy kórshi bolyńyzdar!», dedi Aqparat jáne qoǵamdyq damý mınıstri Darhan Qydyráli.
Atalmysh turǵyn úıdiń qurylysyna «Dara» prezıdenttik bastamalar qory men «Halyq» qaıyrymdylyq qory atsalysqan.
«Áleýmettik mańyzy bar taqyryptardy ári qoǵam aldynda turǵan ótkir máselelerdi kóterip, alǵashqy bolyp dabyl qaǵatyn da, onyń oń sheshimin tabýǵa yqpal etetin de – BAQ ókilderi. Sizderdiń búgingi qýanyshtaryńyzǵa ortaqpyz, bul bizdiń de qýanyshymyz. Oqyrman men kórermenge jaýapkershilikpen qaraıtyn jýrnalıster qashanda qurmet pen qoldaýǵa laıyqty. Sizderdi kásibı merekelerińizben shyn júrekten quttyqtaımyn!», dedi «Halyq» qorynyń basqarýshy dırektory Narıman Ábilshaıyqov.
Baspanaǵa ıe bolǵan BAQ ókilderi bul kásibı mereke qarsańynda shyn máninde kútpegen tosynsyı bolǵanyn aıtyp, rızalyǵyn bildirip jatyr. Qýanyshty habardy jaqyn-jýyǵyna súıinshilegen áriptesterdiń qýanyshynda shek bolmady.
Kásibı mereke kúni qarsańynda «Egemen Qazaqstan» gazetiniń jýrnalısi Joldybaı Bazarov ta bul qýanyshtyń kútpegen tosynsyı bolǵanyn aıtady.
«Men úshin de, otbasym úshin de kútpegen tosynsyı boldy. Astanadan páter alsaq degen tilegimizdiń osylaı iske asqany qanshalyqty orasan qýanysh ekeni aıtpasam da túsinikti. Memleket basshysyna, «Dara» jáne «Halyq» qaıyrymdylyq qorlaryna, Aqparat jáne qoǵamdyq damý mınıstrine, meni osy tizimge qosqan óz ujymyma zor alǵysymdy aıtamyn. Osynyń bári, aınalyp kelgende, elimizdiń tynyshtyǵy men amandyǵynyń arqasynda bolyp jatyr ǵoı. Sondyqtan, eńbegimiz jemisti bolsyn, tabysty bolaıyq. Meniń Alla bergen alty balam bar, sondyqtan da biz úshin bul óte qomaqty syı», deıdi ol qýanyshyn jasyra almaı.
Sol qýanyshty lektiń ishinde ulttyq telearnada 35 jyl boıy qyzmet etip kele jatqan Rahıma Baltabaeva da bar.
«Búgingi kún men úshin eń baqytty kún desem bolady. О́zim eki balanyń anasymyn. Jáne bul meniń alyp otyrǵan alǵashqy páterim. Mundaı bastama kótergen Prezıdentke, sol ıgi iske qoldaý tanytqan Qorǵa jáne telearna basshylyǵyna zor alǵysymdy aıtqym keledi. Osydan birer kún buryn kadr bólimi bizden bir-eki qujat suratqan edi, ony biz áldebir baıqaýǵa tapsyryp jatqan shyǵarmyz dep joramaldadyq. Tap sol sátte osyndaı úlken qýanyshqa kenelemin, maǵan páter buıyrady dep tipti de oılamappyn. Mine, qazir ǵana baspanaly bolǵanymdy bilip, shyny kerek, mundaı úlken tosynsyıǵa júregim jarylardaı qýanyp turmyn», dep aǵynan jaryldy Rahıma Baltabaeva.
Eki bólmeli páterdiń kiltin alyp turyp, qýanyshyn jasyra almaı, kóz jasyna erik bergen BAQ.KZ aqparat agenttiginiń bas redaktory Móldir Asqar oıyn tolqyp jetkizdi: «Bul men úshin úlken qýanysh! Men eńbegim Prezıdent tarapynan elenip, osyndaı syı-qurmetke ıe bolamyn dep eshqashan oılaǵan emespin. Bul rette, osy ıgilikti sharany uıymdastyrýshy «Dara» prezıdenttik bastamalar qory men «Halyq» qaıyrymdylyq qoryna aıtar alǵysym sheksiz».
«Keremet kóńil kúıdemin. Baspana degen kóptegen zamandastarymyzdyń problemasy ǵoı. Alǵashqy jarnasyn jınaısyń, ári tartasyń, beri tartasyń – báribir jetkize almaısyń. Al búgin kútpegen jerden páter kiltin tapsyrǵanda, qandaı kúıde bolǵanymdy sózben aıtyp jetkize almaımyn. Barlyǵyna zor alǵys. Ásirese «Dara» jáne «Halyq» qorlaryna myń márte rahmet. Bul – endi syılyqtyń tóresi boldy!», dep qýanyshymen bólisken Jibek joly telearnasynyń telejúrgizýshisi Ánýar Qarbozov súıinshi habardy aldymen anasyna jetkizip jatty.
«Dara» prezıdenttik bastamalar qorynyń dırektory Ásel Shildebaeva aqparat salasynyń qyzmetkerlerin merekelerimen quttyqtap: «Búgin 65 otbasy úlken qýanyshqa keneldi. Baspanalaryńyz qutty bolsyn! Árqashan armandaryńyz oryndala bersin!», degen aq tilegin aıtty.
Endeshe, qutty qonysyna kóshetin baqytty áriptesterdi qýanyshtarymen quttyqtaı otyryp, ıgilikti istiń basyndaǵy azamattardyń qadamyna sáttilik tileıik.