Memleket basshysy Qasym-Jomart Toqaev taıaýda Túrkistan qalasynda ótken Ulttyq quryltaıda «Ádiletti Qazaqstan – Adal azamat» taqyrybynda sóılegen sózinde aqparat saıasatynyń tıimdiligin arttyrý baǵytynda aýqymdy máseleni kótergen edi.
Prezıdent Qasym-Jomart Toqaev bıik minberden: «Mass-medıa – elimizdi jańǵyrtý isine erekshe yqpal etetin sala. Sondaı-aq bılik pen qoǵam arasyndaǵy pármendi baılanys quraly. Aqparat quraldarynda túrli kózqaras toǵysady. Ony qoǵam tynysynyń barometri deýge bolady. Osy saladaǵy ózekti máselelerdi sheshý úshin aqparat saıasatyn túbegeıli qaıta qaraý qajet», degen.
Memleket basshysynyń bul sózinen, basqasyn aıtpaǵanda, buqaralyq aqparat quraldarynyń aldynda ultqa qyzmet kórsetýdiń ozyq úlgilerine júgine otyryp, ýaqyt talabyna saı jańǵyrý mindeti turǵanyn ańǵarýǵa bolady. Shyn máninde, atalǵan salanyń tıimdiligin arttyrý, ózgeris zamanynda ony negizgi ustanymynan aınytpaı, áleýetin qoǵam ıgiligine durys baǵyttap, izgi maqsatqa paıdalaný úshin naqty qadamdar jasalyp, ózin-ózi aqtaıtyn aýqymdy jobalar qolǵa alynýǵa tıis.
Ahmet Baıtursynuly gazet qyzmeti – halyqqa bas, kóz, qulaq, til bolyp, ultynyń ar-abyroıyn kúzetip, jurtyn jaqsylyqqa bastaýyn amanattaǵan edi. Ult ustazynyń osy ósıeti jýrnalısterdiń moınyndaǵy jaýapkershiliktiń zor ekenin kórsetedi.
Búginde elimizdegi BAQ óziniń ult ustazy aıtqan negizgi mindetin abyroımen atqaryp keledi. Ásirese qoǵamdaǵy jaqsylyqtyń jarshysy bolýda, áttegen-aılar men ózekti máselelerdi kóterýde, atqarýshy bıliktiń nazaryn eldi alańdatqan túıtkilderge aýdarýda elimizdegi BAQ-tyń róli erekshe.
Ras, buqaralyq aqparat quraldarynyń, jýrnalısterdiń eńbegi memleket tarapynan elenbeı qalady, atalǵan salany yntalandyrý, qoldaý isi qaperge alynbaıdy degen pikir jıi aıtylady. Mundaı saryndaǵy pikirlerdi joqqa shyǵarýǵa bolmas, biraq atalǵan máselede ıgilikti bastamalar kóterilip, olardyń laıyqty júzege asyrylyp jatqanyn da aıtýymyz kerek. Desek te otandyq BAQ-ty qoldaý, jýrnalısterdiń áleýmettik-turmystyq jaǵdaıyn kóterý baǵytynda naqty jobalar qolǵa alyna bastaǵany kóńil qýantady. Sonyń bir mysaly retinde Buqaralyq aqparat quraldary qyzmetkerleriniń kúnine oraı medıa salasynda qajyrly qyzmet atqaryp kele jatqan 65 jýrnalıstiń otbasy qýanyshqa keneldi – baspanaly boldy.
Osy jaǵymdy jańalyqtan Memleket basshysynyń otandyq BAQ-tyń bəsekege qabilettiligin arttyrý məselesine aıryqsha nazar aýdaryp otyrǵany aıqyn kórinedi. Mereke qarsańynda berilgen baspana jýrnalıster qaýymynyń eńbegin ádil baǵalaýǵa degen betburystyń bastalǵanyn bildirse kerek. Qazaqstan Prezıdenti Ákimshiligi basshysynyń orynbasary – Prezıdenttiń baspasóz hatshysy Rýslan Jeldibaıdyń aıtýynsha, osyndaı memlekettik qoldaý əli de jalǵasady.
Bıyl BAQ qyzmetkerleriniń kəsibı merekesi tamasha tartýmen bastaldy. Ulttyń ar-abyroıyn kúzetý, jurtty jaqsylyqqa bastaý, jamanshylyqtan saqtandyrý mindetin abyroımen atqarý mańyzdy. Sol úshin de salaǵa memleket tarapynan qoldaý bildirilýi, yntalandyrý jumystarynyń qolǵa alynýy qajet-aq. Bul qajettilikti óteý baǵytyndaǵy jumysty Prezıdent jańasha serpinmen bastap berdi dese bolady. Jaqsylyq jalǵasa bersin, aǵaıyn!