«Týǵan elge taǵzym» ólketaný-zertteý ekspedısııasy aıasynda Taldyqorǵan qalasyndaǵy Nazarbaev zııatkerlik mektebiniń jas zertteýshileri Jetisý oblysynyń ulttyq tarıhy men mádenıetin, florasy men faýnasyn zerttedi.
Olardyń alǵashqy nysany M.Tynyshbaev atyndaǵy Tarıhı-ólketaný murajaıy boldy. Munda kelgen árbir adam Jetisý aımaǵynyń búkil tarıhymen tanysa alady. Odan keıin Tekeli qalasyndaǵy Qora shatqalynyń qaqpasyndaǵy «Býdda» stellasy ekspedısııanyń jas zertteýshilerin tánti etti. Býdda tasy jerden úsh metrge kóterilip tur. Pıramıda tárizdi stellada býddıstik nysandar aıshyqtalǵan.
Odan ári jas zertteýshilerdiń joly Qora ózeniniń oń jaǵalaýynda jalǵasty. Onda zııatkerler flora, faýna jáne Alataý taýlarynyń paıda bolý tarıhy boıynsha zertteý materıaldaryn jınaýmen aınalysty.
GES-1, GES-2 gıdroelektr stansalaryna saıahat balalar úshin qyzyqty boldy. 9-synyp oqýshylary Kárıma Maqan jáne Ajar Ardaqova Qora, Tekeli ózenderinen aýyz sý synama materıaldaryn aldy. Oqýshylar aldaǵy ýaqytta monoqaladaǵy aýyz sý sapasyn zertteýdi josparlap otyr. Sonymen qatar ólketaný-zertteý ekspedısııasynyń qatysýshylary kedergilerden ótý negizderi boıynsha týrıstik kýrsty ótkerdi.
«Búgin men úshin erekshe jarys boldy, óıtkeni ol tabıǵatta, naqty praktıka barysynda ótti. Qaýipsizdik tehnıkasymen jumys isteýdi, arqan túıinderin jasaýdy, karabınderdi qoldanýdy úırendik. Qashyqtyq bıiktik pen marshrýttyń qıyndysy arasynda jaqsy úılesedi. Kóp áser aldyq», dedi jas zertteýshi Mádı Amangeldi.
Bul rette ekspedısııa músheleri óńirdiń ásem tabıǵatymen, biregeı flora men faýnasymen tanysa aldy. Árbir ósimdikti sýretke túsirip, zııany men paıdasyna únildi.
«Biz ekspedısııa sońynda ǵylymı jobalar jazamyz. Meniń jobamnyń taqyryby – «Jetisýdaǵy týrızmdi damytý áleýeti». Meni etnoaýyldar qurý ıdeıasy qyzyqtyrady. О́ńirimizdiń erekshelikteri týraly málimetter teorııalyq turǵydan taldaýǵa kómektesetin oı qorytýǵa negiz boldy», deıdi 11-synyp oqýshysy Ámir Qaınarbekov.
Jetisý oblysy