Búgin segizinshi saılanǵan Parlamenttiń birinshi sessııasy resmı túrde jabyldy. Depýtattar 1 qyrkúıekke deıin parlamenttik kanıkýl dep jarııalanatyny týraly arnaıy qaýly qabyldady, dep habarlaıdy Egemen.kz.
«Búgin biz segizinshi saılanǵan Qazaqstan Respýblıkasy Parlamentiniń birinshi sessııasynyń jumysyn aıaqtap, qorytyndylap otyrmyz. Atqarǵan qyzmetimizdiń nátıjesin dástúr boıynsha túıindep, bolashaqqa josparymyzdy naqtylap alýymyz qajet. О́tken jyly Qazaqstan halqy búkilhalyqtyq referendýmda Prezıdent reformalaryn qoldady. Elimizdiń jańarǵan Konstıtýsııasy búkil memlekettik júıe boıynsha aýqymdy ózgeristerge jol ashty. Sýperprezıdenttik júıeden prezıdenttik respýblıka úlgisine kóshtik», dedi Erlan Qoshanov.
Osy oraıda ol Parlamenttiń róli men mártebesi kúsheıgenin atap ótti. El basqarý isine halyqtyń atsalysý belsendiligi arta tústi. Azamattardyń quqyǵyn qorǵaýdyń konstıtýsııalyq tetikteri nyǵaıtyldy.
«Senat pen Májilis saılaýy eldegi saıası jańǵyrýdyń sheshýshi kezeńine aınaldy. Zań shyǵarýshy organ tolyǵymen qaıta quryldy. Senattyń qurylymy ózgerdi. Qazaqstan halqy assambleıasy Senatta óz mandattaryn aldy. Májiliske alǵash ret 6 saıası partııa saılandy. Osyǵan deıin uzaq ýaqyt boıy oppozısııada bolǵan partııa Parlamentke ótti», dedi Májilis tóraǵasy.
Sondaı-aq ol bul jolǵy saılanym Qazaqstan tarıhyndaǵy eń kóp partııaly Parlament ekenin aıtty. Májilis túrli kózqarastar men saıası kúshter toǵysqan alańǵa aınaldy. Halyq qalaýlylarynyń jańa tolqyny keldi.
«Májilis quramy uzaq jyldan beri alǵash ret birmandatty okrýgten saılanǵan, shynaıy ári tartysty básekede ozyp shyqqan depýtattarmen tolyqty. Sonymen qatar áıelder men erekshe qajettiligi bar adamdardyń jáne jastardyń qatary kóbeıdi», dedi E.Qoshanov.