QMDB Tóraǵasy, Bas múftı Naýryzbaı qajy Taǵanulynyń bastamasymen qasıetti Qurban aıt merekesiniń qurmetine oraı Qaraǵandy oblystyq «Ánet baba» meshitinde 800-ge jýyq búldirshin merekelik qýanyshqa bólendi, dep habarlaıdy Egemen.kz QMDB-nyń resmı saıtyna silteme jasap.
Sharaǵa oblys bas ımamy Estaı Aıtýǵanuly arnaıy qatysyp, balalarǵa ulyq merekeniń qadir qasıeti jaıly nasıhat aıtyp, óziniń izgi tilegin bildirdi.
Meshit aýlasynda ótken merekelik baǵdarlamada ártúrli oıyndar oınatylyp, 800 balaǵa oıynshyqtar men balmuzdaqtar taratyldy. Sondaı-aq ártúrli janýardyń kıimin kıgen anımatorlar oıyn-saýyq kórsetip, balalarǵa qýanysh syılady.
Búldirshinder arasynda vıktorınalyq suraq-jaýap ótkizilip, durys jaýap bergenderge syılyqtar berildi. Meshit aýlasyna tigilgen qazaqy kıiz úıde arnaıy as ázirlenip, búldirshinderge ystyq as úlestirildi. Osylaısha, Qaraǵandy shaharynyń búldirshinderi uly meıram – qurban aıtty ulyqtady.
Aıta keteıik, ıgi shara Qaraǵandy oblystyq «Ánet baba» meshitiniń, «Iаsın» qyzdar ortalyǵy men «Nurly bilim» qoǵamdyq birlestiginiń jáne jergilikti demeýshilerdiń birlese uıymdastyrýymen júzege asty.