L.N.Gýmılev atyndaǵy Eýrazııa ulttyq ýnıversıtetiniń 4-kýrs stýdenti Dııas Tashtıev «Ar-ujdan» atty mýzykalyq trek jazdy. Bolashaq energetık óziniń shyǵarmashylyǵy arqyly jalpyadamzattyq qundylyqtardy nasıhattaýǵa úndeıdi. Trektiń úzindisi jasandy ıntellekt kómegimen daıyndalǵan.
Talantty jas eki jylǵa jýyq ýaqyttan beri mýzykamen aınalysady. Qoly bos ýaqytynda án mátinin jazady. Ol óziniń «Ar-ujdan» atty alǵashqy mýzykalyq kompozısııasyn rep stılinde shyǵaryp, onyń snıppetin usyndy. Ony túlekterdiń eń aýqymdy «ENU family day» kezdesýinde oryndady. Mýzykalyq týyndyny búginde ártúrli strımıng servısteri arqyly tyńdaýǵa bolady.
«Kompozısııamnyń ekinshi bóliminde ózime kómektesetin qaǵıdalar týraly aıtamyn. Olardyń ishindegi eń mańyzdysy – ar-ujdan. О́z basym, oqýǵa nemese kez kelgen iske adaldyq turǵysynan qaraımyn. Bul maǵan ózime ǵana emes, basqalarǵa da adal bolýǵa úndeıdi. Úlken qurmet, kishige izet kórsetý – ádeptilik. Biz keıde osy qarapaıym erejeni umytyp ketemiz. Al ánge kelsek, onyń mátinin eki saǵat ishinde jazyp, oǵan laıyqty bı oılap taptym. Shyǵarmanyń alǵashqy nusqasyn tanystarym tyńdap, olardyń kóńilinen shyqty», deıdi ol.
Daryndy stýdent mýzykamen aınalysyp qana qoımaı, bıznes ıdeıalaryn júzege asyrýǵa tyrysady. Osy baǵyttaǵy eńbegi de esh ketken joq. Eýrazııa ýnıversıtetiniń bıznes-ınkýbatory uıymdastyrǵan startap-jobalar baıqaýynda ekinshi orynǵa ıe bolǵan. Búginde ol shyǵarmashylyq qabiletin odan ári shyńdap, endi jaryqqa shyǵatyn birneshe án mátinin jazyp úlgergen.