Astanaǵa AQSh-tyń Arızona ýnıversıtetiniń stýdentteri keldi. Olar L.N.Gýmılev atyndaǵy Eýrazııa ulttyq ýnıversıtetinde bilim alyp, alty apta ishinde jazǵy mektep formatynda til meńgerip, ulttyq qundylyqtarymyzben tanysady.
Arızona ýnıversıtetiniń stýdentterine arnalǵan oqý baǵdarlamasyn Eýrazııa ýnıversıtetiniń oqytýshylary ázirlegen. Mazmundy oqytý ádistemesi tek akademııalyq júktemeni ǵana emes, sondaı-aq ulttyq mádenıetti zerdeleýge arnalǵan aýdıtorııadan tys sabaqtardy da qamtıdy. Sonymen qatar atalǵan joǵary oqý ornynyń oqytýshylary men eriktileri sheteldik meımandarǵa Astana men Aqmola oblysynyń tabıǵatymen, kórkem jerlerimen tanystyryp, ekskýrsııa uıymdastyrady.
Sheteldikterge arnalǵan kýrstyń oqytýshysy Aıjan Maıbalaeva AQSh-tan kelgen stýdentter ulttyq mádenıetimiz ben salt-dástúrimizge erekshe qyzyǵýshylyq tanytyp otyrǵanyn atap ótti. Sheteldik meımandardyń suranysyna sáıkes oqý mazmuny eltanýǵa baǵyttalǵan.
– Sondaı-aq stýdentter qazaq tilin úırenýge ynta bildirip, qosymsha sabaq ótkizýdi surady. Biz qonaqtarymyzǵa kúndelikti qarym-qatynasqa qajetti qazaq tilindegi sózder men sóz tirkesterin úıretemiz. Sonymen birge sheteldik stýdentterdi qazaq tiliniń erekshe dybystarymen tanystyrýdy bastap, eń qajetti mınımaldy leksıkany meńgerýge kómektesemiz. Oqý materıaldarynda halqymyzdyń tynys-tirshiligi men elimizdiń áleýmettik jáne mádenı damýy týraly málimet molyraq, – dedi ǵalym.
Arızona ýnıversıtetiniń stýdenti Meıson Moltbı bizdiń elge buǵan deıin de at izin salyp, Abaı atamyzdyń shyǵarmasymen tanysyp úlgergen eken.
– Qazaqstanǵa kelýge kópten beri qyzyǵyp júrdim. Professorym maǵan osynda barýdy usyndy. Bir jaǵynan, qazaq mádenıetimen, dástúrimen jaqyn tanyssam dep oıladym. AQSh-ta orys tili men shyǵarmashylyq jazý jáne dintaný pánin oqımyn. Bolashaqta aýdarmashy bolǵym keledi. Ásirese Orta Azııa men Qazaqstan qalamgerleriniń ádebı shyǵarmalaryn aýdarsam deımin. Abaıdy biraz oqyp, erekshe áser aldym. Endi qazaq aqyndarynyń jyr jınaqtaryn kóbirek oqýdy josparlap otyrmyn. Eýrazııa ýnıversıtetiniń kampýstary erekshe unady. Bizdiń ýnıversıtette sizderdegi sekildi ıoga, gımnastıka jáne ústel tennısine arnalǵan zaldar joq, – dedi amerıkalyq stýdent.
Jazǵy mektep jumysynyń qorytyndysynda sheteldik stýdentterge tildik kýrsty aıaqtaý týraly sertıfıkat tabys etiledi.