Jaqynda ǵana Syrda Seýl ulttyq ǵylym jáne tehnologııalar ýnıversıtetiniń fılıaly ashylatynyn habarlaǵan edik. Búginde SeýlTeh pen Qorqyt ata atyndaǵy Qyzylorda ýnıversıteti arasyndaǵy «Halyqaralyq yntymaqtastyq boıynsha jetekshi ýnıversıtettik joba» júzege asyryla bastady. Alda jergilikti oqý ordasynda jasandy ıntellekt mektebi qurylyp, mamandar daıarlanady.
Osyǵan baılanysty Syr óńirine jumys saparymen kelgen SeýlTeh ýnıversıtetiniń delegasııasymen oblys ákiminiń birinshi orynbasary Serik Qojanııazov kezdesip, alda birlesip atqarar sharýalardy talqylady.
Professor Chasý Kım men Sýnggon Kım bastaǵan LUPIC jobasynyń ókilderi birshama ýaqyt Qorqyt ata atyndaǵy ýnıversıtette zerthanalardy ornalastyrýdyń keńistiktik aspektilerin, bıznes-ınkýbasııa ortalyǵyn qurýǵa qatysty máselelerdi zertteıtin bolady.
Osy jyldyń mamyr aıynda Qyzylorda oblysynyń ákimi Nurlybek Nálibaev Koreıaǵa sapary aıasynda Seýl Ulttyq ǵylym jáne tehnologııalar ýnıversıtetiniń prezıdenti Lı Dong Hýn myrzamen kezdesip, Syrda oqý ornynyń fılıalyn ashýdy usynǵan bolatyn. О́ńirde osy jobany iske asyrýǵa jan-jaqty qoldaý kórsetilip, bilim alýshylarǵa jyl saıyn oblys ákimdigi, Ǵylym jáne joǵary bilim mınıstrligi tarapynan granttar beriledi. Oblystyń damý baǵdarlamasy bıýdjetine kampýs pen tehnopark qurylysyn engizý de josparlanyp otyr.
QYZYLORDA