Bıyl elimizde UBT tapsyrýǵa 304 myń túlek ótinish bildirip, olardyń 79%-y shekti ball jınaǵan. Negizgi UBT qorytyndysy týraly jáne jańa oqý jylyna bólinetin granttar jaıly Ǵylym jáne joǵary bilim vıse-mınıstri Qýanysh Erǵalıev óziniń Feısbýktegi jeke paraqshasynda jazdy, dep habarlaıdy Egemen.kz.
«Búgin elimizde grant konkýrsyna qatysýǵa múmkindik beretin negizgi UBT aıaqtaldy. 18 mamyr men 5 shilde aralyǵynda barlyǵy 304 myń túlek testileýge ótinish bildirdi. Solardyń 76% qazaqsha test tapsyrdy. 79% shekti ball aldy. Byltyrǵy jylmen salystyrǵanda shamamen 10%-ǵa ósti. Sonymen qatar bıyl UBT-nyń ortasha baly − 70 boldy, bul byltyrǵy kórsetkishten 3 ball joǵary», delingen jazbada.
Sondaı-aq vıse-mınıstr bıyl joǵary oqý ornyna túsetin abıtýrıentterge qandaı jaǵdaı jasalyp jatqanyn jazyp, memlekettik tapsyrys aıasynda bólinetin granttar týraly aqparat berdi.
«Prezıdenttiń tapsyrmasyna sáıkes, bıyl granttardyń sany 5 myńǵa ósti. Al stıpendııanyń mólsheri 20%-ǵa ósedi. 2023-2024 oqý jylyna bólinetin memlekettik tapsyrystyń kólemine toqtalar bolsaq: bakalavrıatta – 73061 grantty, magıstratýrada – 13088 grantty, doktorantýrada – 1890 oryndy qurap otyr. Granttardyń 60%-y ınjenerlik jáne tehnıkalyq mamandyqtarǵa bólindi, pedagogıkalyq kvotany 47%-ǵa deıin ulǵaıttyq. Ol tek óńirlik ýnıversıtetterge ǵana bólindi. Prezıdent Qasym-Jomart Kemeluly Toqaevtyń tapsyrmasyna sáıkes, bıyl halyq tyǵyz qonystanǵan, batys óńirinen shyqqan jastarǵa jańadan qurylǵan oblystardyń jastaryna arnaıy 5000 grant qarastyrylǵan, áleýmettik osal jeti topqa, aýyl túlekterine (35%) arnaıy kvota qarastyrylǵan. Alǵash ret aýylsharýashylyq jáne ınjenerlik baǵyttardy qoldaý maqsatynda pılottyq rejımde arnaıy kvota bóldik. Ol tek óńirlik ýnıversıtetterge bólindi», dep jazdy Qýanysh Asylhanuly.
Sonymen qatar vıse-mınıstrdiń málimetinshe, «Serpin» baǵdarlamasy boıynsha 18 JOO-ǵa 3653 grant qarastyryldy. Al sheteldik ýnıversıtetterdiń fılıaldarynda oqý úshin arnaıy grant bólindi.
«Qorytyndylaı kele, talapkerlerge aıtarymyz, oqý ornyn tandaǵanda jataqhananyń bolýyn tekserip alý qajet. Almaty men Astanadaǵy jataqhanalarda oryn jetispeýshiligi máselesi bar. Sondyqtan óńirlik ýnıversıtetterge túsýge keńes beremiz. Al sapa jaǵynan olar kem emes. Kelesi aptada UBT nátıjeleri týraly tolyǵyraq «Ortalyq kommýnıkasııalar qyzmeti» alańynda baıandaımyz», delingen vıse-mınıstrdiń jazbasynda.