Mańǵystaý oblysyna jumys sapary aıasynda Premer-mınıstr Álıhan Smaıylov óńirdi sýmen qamtamasyz etý kólemin arttyrý úshin «Kaspıı» tushylandyrý zaýytyn keńeıtý jobasymen tanysty, dep habarlaıdy Egemen.kz Úkimettiń baspasóz qyzmetine silteme jasap.
2020 jyly bastalǵan zaýytty keńeıtý jumystary qazirgi ýaqytta aıaqtalýǵa jaqyn. Jobany iske asyrý nátıjesinde «Kaspııde» aýyz sý berý táýligine 40 myń tekshe metrge deıin ulǵaıýǵa tıis, bul óńirdi sýmen turaqty túrde qamtyp otyrýǵa múmkindik beredi.
Kásiporyn dırektory Nurlybaı Aqqulov zaýytty jańǵyrtý boıynsha júrgizilip jatqan jumystar týraly baıandady. Onyń aıtýynsha, jobany aıaqtaý úshin qajetti jabdyqtardy satyp alýǵa shamamen 5 mlrd teńge qajet.
Premer-mınıstr Mańǵystaý oblysyndaǵy Munaıly, Túpqaraǵan jáne Qaraqııa aýdandarynyń 180 myń turǵyny úshin bul jobanyń mańyzy zor ekenin atap ótti.
«Úkimet ony jaqyn arada aıaqtaý úshin qajetti qarajatty bóledi. Oblys ákimdigi tushylandyrý zaýytynda jańa óndiristik qýattardy jedel iske qosý boıynsha barlyq sharany qabyldaýy qajet», dedi Álıhan Smaıylov.