Keshe Astana tórinde alǵash ret elordanyń 25 jyldyǵyna arnalǵan «Tolaǵaı» alyptar saıysy ótti. Uly Dalanyń batyrlaryn nasıhattaýda, qazaqtyń etno-oıyndaryn dáripteý maqsatynda ótkizilgen týrnırge bilegi toqpaqtaı, jaýyryny qaqpaqtaı elimizdiń ár óńirinen 15 sportshy baq synady, dep habarlaıdy Egemen.kz elorda ákimdiginiń resmı saıtyna silteme jasap.
Is-sharanyń ashylý saltanatyna Astana qalasy ákiminiń orynbasary Eset Baıken, Qazaqstan Respýblıkasy Parlamenti Májilisiniń depýtattary Dáýlet Turlyhanov, Isa Qazybek jáne «Tolaǵaı» alyptar saıysynyń avtory Temir Spataev qatysty.«Tolaǵaı» alyptar saıysy – bul salaýatty ómir saltyn nasıhattaıtyn kópsaıysty týrnır. Erekshe joba alǵash ret 2022 jyly Jer jánnáty Jetisý oblysynyń Jarkent tórinde júzege asqan edi. Endi mine Qazaqstannyń elordasy Astana qalasynda ótkizilip otyr. Osyndaı alyptar saıysynan aty ańyzǵa aınalatyn sportshylar shyǵyp, keshegi el tarıhyndaǵy tolaǵaılardyń izin basatyn, tulparynyń dúbiri dalany shaıqaǵan batyr babalardyń urpaǵy degen atqa laıyq bolatyn alyptardyń qatary kóbeıe bersin!», dedi qala ákiminiń orynbasary Eset Baıken.
Bilekti batyrlar saıystyń 5 túri boıynsha ıaǵnı, 1,5 m uzyndyqtaǵy temirdi moıynǵa salyp maıystyrý, salmaǵy 140 kelilik tasty mejeli qashyqtyqqa deıin aparý, 100 keliden asatyn aýyr bóreneni jelkege salyp otyryp-turý, jarty tonnalyq arbany súıreý, on kelilik naızany qashyqtyqqa laqtyrý sekildi erekshe saıys túrleri boıynsha synǵa tústi.
Bes saıystyń qorytyndysy boıynsha 120 upaıpen Shymkent qalasynyń týmasy Ádilet Nurǵısa III orynǵa ıe bolyp, 400 000 teńge qarjylaı syılyqty qanjyǵalady. 122 upaı sanmen Qonaev qalasynyń sportshysy Faıd Teńizbaev júldeli ekinshi orynǵa ıe bolyp, 600 000 teńge qarjylaı syılyq utyp aldy. Al oza shapqan bilekti batyr túrkistandyq Azamat Maqulbekovke buıyrdy. Ol «Tolaǵaı» alyptar saıysynyń jeńimpazy atanyp 1 mln teńgege ıe boldy.Uıymdastyrýshylardyń aıtýynsha byltyr Jetisý jerinde ótken dodany endi jyl saıyn ótkizý josparlanyp otyr. Aıta keteıik, jalpy júlde qory eki mıllıon teńgeni quraǵan týrnır Astana qalasy ákimshiliginiń ortalyq alańynda ótti.