Eńseli elordanyń qalanǵan ár kirpishiniń tarıhy bútin respýblıkaǵa aıan. Alaıda sol tastarynyń alyp ǵımaratqa, óńirdiń áleýmettik-ekonomıkalyq ortalyqqa aınalýyna sep bolǵan azamattardy bile bermeımiz. Osy oraıda Astananyń rýhanı damýyna, órkenıetti orta qalyptastyrýda jaqsylyq jasap jarysyp júrgen elordalyq eriktilerdiń erligi erekshe. «Astana jastary» – elordalyq jas býynnyń basyn biriktirgen Jastar resýrstyq ortalyǵy kommýnaldyq memlekettik mekemesi. Ol óńirlik deńgeıde 2014 jyly 7 aqpanda qurylǵan. Basty maqsatty – memlekettik jastar saıasatyn júıeli iske asyrý.
Qazir ortalyq 14 pen 35 jas aralyǵyndaǵy azamattardy jumysqa tartyp, eriktiler qozǵalysyn jetildirýde, aýla klýbtaryn damytyp, olardyń jańa bastamalaryn qoldaýda, quqyqtyq kómek kórsetýde belsendi.
– Astana qalasynda jastar saıasatyn damytý sheńberinde jumystyń basym baǵyty – jastardy jumysqa ornalastyrý jáne turaqty jumyspen qamtamasyz etý, sondaı-aq esh jerde oqymaıtyn, esh jerde jumys istemeıtin jáne kásiptik oqytý kýrstaryna qatyspaǵan NEET sanatyndaǵy jastar sanyn qysqartý kún tártibinde. Osy baǵytta jastardyń eńbek naryǵyna ótýi úshin «Astana jastary» JRO jastardy jumysqa ornalastyrý, áleýmettendirý jáne jan-jaqty qoldaý negizinde jobalardy iske asyrady. Máselen, 2022 jyly osy baǵytta jalpy 24 560 adamdy qamtı otyryp, 5 joba sheńberinde 80-ge jýyq is-shara uıymdastyryldy. Olardyń ishinde byltyrǵy 1 jeltoqsandaǵy jaǵdaı boıynsha jastar arasynan 10 myńǵa jýyq adam keńes aldy. О́tinishterdiń 80-90%-y kásiptik baǵdar berý jáne jumysqa ornalastyrý, sondaı-aq turǵyn úı máselelerine qatysty boldy. «Time to change» jobasy negizinde «Jastardyń kásibı jáne jeke daǵdylaryn damytý mektebi» onlaın jáne oflaın trenıngter ótkizedi. 2022 jyldyń basynan jalpy sany myń adamdy qamtıtyn 33 trenıng uıymdastyryldy. 4 bos oryndar jármeńkesi sátti ótti. Oǵan elordadan 146-dan astam jumys berýshi: «Bilim Way», Qazaqtelekom, Nursultan Nazarbaev halyqaralyq áýejaıy, «Integra Construction KZ», «Binom Education», «Forte Bank», «Dom Ýıýt» arhıtektýralyq jobalaý bıýrosy sekildi uıymdar qatysty. Osylaısha, 1 800-den astam bos jumys oryndary usynyldy. Nátıjesinde, jármeńke barysynda eki qolǵa bir kúrek tappaı sendelgen 200-ge jýyq azamat jumysqa ornalastyryldy. Al bıyl dál osyndaı is-sharalar toqsan saıyn uıymdastyrylady. Oǵan 3 myńǵa jýyq azamatty tartý arqyly eńbekke baýlý kózdelgen, – dedi Astana qalasy ákimdiginiń «Astana jastary» JRO» KMM basshysy Shyńǵys Tileýlın.
Sondaı-aq «Astana jastary» JRO bazasynda Volonterler jyly aıasynda jáne 2021-2023 jyldary volonterlikti damytýdyń «Jol kartasyn» oryndaý sheńberinde Qalalyq volonterler shtaby jumys isteıdi. Turaqty túrde 30 volonterlik uıymmen jáne 20 bastamashyl toppen, 4 ÚEU-men birlese qyzmet atqarýda. Shtabta 5 myńnan asa belsendi volonter bar.
– Volonterlermen birge 600-den asa is-shara ótkizildi. Aıta ketý kerek, elordalyq volonterler dzıýdodan Azııa chempıonaty, «Kazakhstan Security System» forýmy, «Eurasian Book Fair», Naýryz «Ekspo», «Illıýzııa obmana» sııaqty halyqaralyq aýqymdaǵy is-sharalarǵa únemi qatysady. Sondaı-aq Polısııa departamenti, TJD men birlesip gazdandyrý týraly halyqty aqparattandyrý, jylytý maýsymy men kóktemgi sý tasqyny kezindegi qaýipsizdik sharalary, shomylý maýsymyndaǵy minez-qulyq erejeleri, halyq sanaǵy máselesi, qalanyń qoǵamdyq oryndarynda koronavırýs ınfeksııasy kezeńinde qorǵaý sharalary boıynsha halyqqa aqparattyq-túsindirý jumystaryn turaqty negizde júrgizedi jáne esirtki satý týraly málimetteri bar qabyrǵalardy boıaýǵa, iz-túzsiz joǵalǵan adamdardy izdeýge kómektesedi. Máselen, «Adresa zaboty» jobasy aıasynda «Astana jastary» volonterleri jalǵyzbasty 40 zeınetkerdiń jeke aýlasyn tazalaýǵa qolushyn sozdy. Kásiporyndar men volonterlik uıymdar qar tazalaý boıynsha 20 aksııa uıymdastyrdy. Oǵan 2 myńnan asa volonter men kásiporyn qyzmetkeri jumyldyryldy. Búginde volonterlik uıymdarmen birlesip «BizBirgemiz», «Qaýipsiz qala», «Qamqorlyq meken-jaılary», «Ardagerlerdi ardaqtaıyq», «Taza Alem» sekildi myńǵa jýyq aksııa ótkizildi. Muqtaj jandarǵa azyq-túlik sebetterin taratý, kıim-keshek jáne jıhazben qamtamasyz etý, oqytý jáne taǵy basqa da kómek túrleri kórsetildi, – dedi Shyńǵys Tileýlın.
Astanalyq eriktiler qalalyq jáne respýblıkalyq deńgeıde ǵana emes, halyqaralyq is-sharalardan da qalys qalmaıdy. Máselen, forým, konsertterde aýdarmashy, gıd, uıymdastyrýshy, tımlıder, top ımıdji, taǵy basqa da pozısııalarda júrip qolǵabys etedi. El basyna kún týyp, tótenshe jaǵdaı bola qalsa, únemi bir jaǵadan bas, bir jeńnen qol shyǵaryp birinshi bolyp járdemdesedi. Tipti Túrkııa men Sırııa halqyn tótennen tentiretken oqys jaǵdaıda da qaıyrymdy jandar elordanyń 20 volonterlik uıymymen birlesip, 100 tonnaǵa jýyq gýmanıtarlyq kómek jınap, jóneltti.
– Volonter bolý – ıgi is. Mundaı ortaǵa jınalǵandar bir-birimen tájirıbe almasady, el kóredi, jer kóredi. Qazaqta «Úıińdi taspen emes, dospen qorsha» degen jaqsy sóz bar. Erikti bolý – jańa dos tabatyn úlken múmkindik. Sol arqyly orta qalyptasady. Al aınaladaǵy adamdardan alǵysyn alǵan kezde erekshe sezimde bolamyn. Ony sózben aıtyp jetkizý múmkin emes, – deıdi volonter Mereı Qalel.
Qazaqstannyń túkpir-túkpirinen júregi meıirimge toly jandar ún qosqan «Júrek jylýy» qaıyrymdylyq aksııasyna uıytqy bolǵan da osy «Astana jastary» JRO-nyń eriktileri. Muny Memleket basshysy Qasym-Jomart Toqaevtyń qoldaǵany belgili. Qazirgi ýaqytta 310-ǵa jýyq hat qabyldanǵan. Aksııa jyl sońyna deıin jalǵaspaqshy. Sondaı-aq Prezıdent jol bastaǵan «Taza Alem» ekologııalyq jobasy da qarqyndy júzege asyp keledi. Búginde volonterler 9 aksııa ótkizip, ózen jaǵasyn, Aqbulaqtyń saǵalaryn tazartty.
– «Astana jastary» volonterlik qozǵalysyndaǵy volonterlerdiń ortasha jasy 15-16 jasty quraıdy. Bul – jastar ýaqytty paıdaly ótkizýge, jańa dos, tyń áser alýǵa jáne qorshaǵan ortaǵa qolǵabys kórsetýge tyrysatyn kezeń. Al qalalyq volonterler shtaby jobasyndaǵy volonterlerdiń ortasha jasy 30-dan bastalady. Mundaǵy volonterler sanaty qoǵamǵa kómektesý, tabıǵatty qorǵaýǵa basymdyq beredi. Olar eshqashan tólem almaıdy. Biraq biz olardy keıbir qajetti jabdyqtarmen qamtýǵa, konsertterge tegin bıletter berýge tyrysamyz. Iаǵnı ázirge volonterlerdi marapattap qana yntalandyryp otyrmyz. Volonterlikti eńbek ótili retinde sanaý máselesi Úkimette birneshe ret kóterildi. Biraq ol ázirge tek talqylaný deńgeıinde, zańdy negizde bekitilgen joq, – dedi Astana qalasy ákimdiginiń «Astana jastary» JRO» KMM-niń eriktiler qozǵalysyn damytý bóliminiń basshysy Elvıra Esmuhanova.
Jalpy, elordada 50-ge jýyq volonterlik uıym men qozǵalys turaqty negizde jumys isteıdi. Búginde olardyń sapyna qosylǵysy keletinder sany artyp keledi. Ásirese balalar kóbirek qyzyǵýshylyq tanytýda. Olardyń sebepteri men maqsattary ártúrli. Keıbireýleri bireýge járdem etýdi maqsat tutsa, endi biri sheteldik joǵary oqý oryndaryna túsý úshin portfolıosyn jaqsartýdy kózdeıdi. Dese de, erikti bolý – erlikpen teń.