Nomad City Hall teatrynda elordalyq densaýlyq saqtaý salasynyń 25 jyldyq mereıtoıy men medısına qyzmetkerleri kúnine arnalǵan saltanatty shara ótti, dep habarlaıdy Egemen.kz qala ákimdiginiń resmı saıtyna silteme jasap.
Saltanatty jıyn Astanadaǵy densaýlyq saqtaý salasynyń jetistikteri týraly beınekórinispen bastaldy.
Sandyq derekterge sáıkes, sońǵy 10 jylda elordada týý kórsetkishi 41 paıyzǵa artyp, astanalyqtardyń jalpy sany 2 esege ósti. Týberkýlezden bolatyn ólim 13,1 paıyzǵa kemise, qaterli isik ólim-jitimi 3 ese tómendedi. Sondaı-aq jazataıym oqıǵalar men ýlanýdan bolatyn ólim-jitim 16,7 paıyzǵa azaıǵan. Astanadaǵy medısına uıymdarynyń sany 38-den 314-ke deıin artty. Sońǵy 2 jylda kesh qyzmet kórsetilgen jedel járdem shaqyrýlarynyń úlesi 8,1 paıyzdan 4,1 paıyzǵa deıin tómendedi. Búginde elordada materıaldyq jaraqtandyrý 95 paıyzdy quraıdy.
Aq halatty abzal jandardyń baǵa jetpes eńbegin nasıhattaýdy maqsat etken jıynǵa qala ákiminiń orynbasary Erlan Bekmurzaev qatysyp, barsha jınalǵan medısına qyzmetkerlerin quttyqtady.
«Sizderdi kásibı merekelerińizben jáne qalalyq densaýlyq saqtaý júıesiniń 25 jyldyǵymen quttyqtaımyn. 25 jylda elordada densaýlyq saqtaý salasy qarqyndy damydy. Týý kórsetkishi ósip, elordalyqtardyń ómir súrý uzaqtyǵy artty. Munyń barlyǵy aq halatty abzal jandardyń eńbeginiń arqasynda dep bilemin. Sizder kún saıyn adamdardyń ómirin saqtap, densaýlyǵyn qalpyna keltirýge kómektesip kele jatyrsyzdar. Mańyzdy ári ólsheýsiz eńbek etip júrgen barlyq qyzmetkerlerdiń erligi eń joǵary maqtaýǵa laıyq», dedi qala ákiminiń orynbasary.
Izinshe Erlan Bekmurzaev birqatar qyzmetkerge qala ákimi men orynbasarynyń Alǵys hatyn tabystady. Odan keıin QR Densaýlyq saqtaý birinshi vıse-mınıstri Tımýr Slamjanuly mınıstrlik atynan birqatar elordalyq aq halatty abzal jandardy tósbelgimen marapattady.
Marapattaý rásiminen keıin qalalyq Qoǵamdyq densaýlyq saqtaý basqaramasynyń basshysy Tımýr Muratov elordadaǵy medısına salasynyń jetistikteri týraly aıtyp, bir top áriptesine óz atynan Alǵys hat tapsyrdy.
Jıyn barysynda 8 nomınasııa boıynsha osy jyldyń eń úzdik medınısa qyzmetkerleri men medısına ujymdary marapattaldy.
Bıylǵy «Úzdik MSAK uıymy» nomınasııasy boıynsha №2 qalalyq emhana jeńimpaz atandy. №2 kópbeıindi qalalyq balalar aýrýhanasynyń bas dárigeri Gúlnár Kýlýshevaǵa «2023 jyldyń tıimdi menedjeri» nomınasııasy berildi. №3 brıgada ujymy «Úzdik jedel medısınalyq járdem brıgadasy» júldesin jeńip aldy. №2 qalalyq kópbeıindi aýrýhananyń dárigeri Rýslan Hasenov «Úzdik hırýrg» nomınasııasyna ıe boldy. Al №3 qalalyq emhananyń qyzmetkeri Gúlbaný Beısembaeva «Úzdik farmasevt» atalymy boıynsha jeńimpaz atandy. «Úzdik akýsher-gınekolog» nomınasııasynyń ıegeri №2 qalalyq kópbeıindi aýrýhananyń dárigeri Olga Vaskovskaıa boldy. №2 kópbeıindi qalalyq balalar aýrýhanasynyń qyzmetkeri Aıgúl Sadýaqasova «Úzdik orta medısına qyzmetkeri» nomınasııasyna ıe boldy. Al 2023 jyldyń «Úzdik jalpy praktıka dárigeri» dep №13 qalalyq emhananyń dárigeri Janat Muratqalıeva tanyldy.