Kerbulaq aýdanynyń Basshı eldi mekeninde aýyl jastaryna arnalǵan kúres zaly ashylyp, jergilikti jurtshylyqty qýanyshqa bóledi. Jańa nysannyń qurylysyn júrgizgen merdiger kompanııa nysandy dál merziminde aıaqtap, eldiń ıgiligine usyndy.
Kúres zalynyń ashylý saltanatyna qatysqan Kerbulaq aýdanynyń ákimi Qanat Esbolatov, oblystyq dene shynyqtyrý jáne sport basqarmasynyń basshysy Ulan Rysqul, grek-rım kúresinen Azııa chempıony Marǵulan Ásembekov aýyl turǵyndaryn quttyqtap, júrekjardy tilekterin arnady.
– Qoldanysqa berilip otyrǵan kúres zalynyń qurylysyna jergilikti bıýdjetten 135 mln 400 myń teńge bólinip, «Baýyr qurylys kompanııasy» jaýapkershiligi shekteýli seriktestigi el ıgiligine usyndy. Keleshekte osy sport zalynan qazaqtyń atyn shyǵaratyn aıbyndy uldar men ór rýhty qyzdar kóptep shyqsyn, – dedi Qanat Esbolatov.
Kúres zalynyń tusaýyn Ulan Rysqul men Basshı aýyldyq okrýgindegi aqsaqaldar alqasynyń tóraǵasy Jaqypbek Samyltyruly kesip, jas palýandardyń shynyǵýyna usyndy.
Kúres zalyndaǵy erkin kúres úıirmesiniń jattyqtyrýshysy Azamat Qoıbaǵarovtyń aıtýynsha, Basshı aýylynda kúreske qumar ul-qyzdar barshylyq. 30-35 bala erkin kúrespen turaqty aınalysyp keledi. Olardyń basym bóligi aýdandyq, oblystyq, respýblıkalyq birinshilikterden júldeli oryn alyp júr.
Jetisý oblysy