Qarapaıym zattardan, turmystyq tehnıka qaldyqtarynan robottar jasap tanylǵan talǵarlyq stomatologti bireý bilse, bireý bilmes. Onyń endigi maqsaty – sheberhana salyp, ózgelerge temirmen jumys isteýdi úıretý.
Shańsorǵyshtan robot, kir jýatyn mashınadan ushqysh jáne kólik bólshekterinen termınator qurastyrǵan tis dárigeri osy kúnge deıin 40-tan asa músin jasapty. Búginde Qýanysh Muhamedjanovtyń úıindegi murajaıyna kelýshiler sany artyp, Talǵar qalasyndaǵy qyzyqty nysannyń birine aınalǵan. Tipti sheteldik týrıster de at basyn buryp turady.
– Keıingi bir jylda 10 músin jasadym. Olardyń arasynda eki gorılla, Optımýs Praım jáne Aıdahar bar. Kópke tanymal Vallı robottyń da kóshirmesin jasadym. Olardyń barlyǵy turmystyq temir qaldyqtarynan qurastyrylǵan. Qazir plastık qaldyqtarmen jumys istep jatyrmyn, – deıdi art-músinshi Qýanysh Muhamedjanov.
Sheber únemi sheberligin shyńdap, sheteldik áriptesterimen tájirıbe almasyp otyrady. Bolashaqta burynǵydan da kúrdeli músinder jasap, sheteldik sheberlermen ortaq jobany qolǵa almaq. Máselen, mýzeıdegi úlken gorıllany biraz jyl buryn brıtandyq músinshi kóliktiń bamperinen qurastyrypty. Al talǵarlyq sheber turmystyq plastıkalyq qaldyqtardan jasaǵan. Gorılla jobasy osylaı bastalǵan. Olardyń salmaǵy 300 kılo jáne tek qaıta óńdelgen plastıkten qurastyrylady. Eks-stomatologtiń endigi maqsaty – murajaı aýmaǵyn ulǵaıtyp, músinder túrin kóbeıtý. Oǵan qosa balalarǵa arnalǵan keıipkerlerden eresekterge arnalǵan músinder qurastyrýǵa nıettenip otyr.