Qazaqstan Premer-mınıstrdiń orynbasary – Syrtqy ister mınıstri Murat Nurtileý BUU Bas hatshysynyń orynbasary, BUU Terrorızmge qarsy kúres basqarmasynyń (TQKB) basshysy Vladımır Voronkovpen kelissóz júrgizdi.
Kezdesýge sondaı-aq BUU Qaýipsizdik Keńesiniń Terrorızmge qarsy komıteti (BUU TQK) Atqarýshy dırektoratynyń Atqarýshy dırektory Natalıa German qatysty.
Taraptar óńirlik qaýipsizdik, Aýǵanstandaǵy ahýal, «Jýsan» jáne «Rýsafa» qazaqstandyq gýmanıtarlyq operasııalary, Qazaqstannyń BUU TQKB jáne TQK-men ózara is-qımylyn talqylady. Sondaı-aq BUU-nyń Ortalyq Azııa memleketterine terrorızmge qarsy kúres, zorlyq-zombylyq ekstremızmniń aldyn alý jáne oǵan qarsy is-qımyl máseleleri boıynsha baǵdarlamalyq qoldaýy máseleleri sóz boldy. Kezdesýde Almatyda BUU-nyń Ortalyq Azııa elderi men Aýǵanstannyń ornyqty damýy jónindegi О́ńirlik ortalyǵyn qurý jónindegi Qazaqstan bastamasy talqylandy.
Osy kúni Syrtqy ister mınıstrliginde vedomstvonyń Erekshe tapsyrmalar jónindegi elshisi Talǵat Qalıev pen BUU Bas hatshysynyń orynbasary V.Voronkovtyń tóraǵalyǵymen Qazaqstanda akkredıttelgen dıplomatııalyq korpýs pen halyqaralyq uıymdardyń ókilderine arnalǵan brıfıng ótti. Is-shara BUU Terrorızmge qarsy kúres basqarmasynyń jumysy jáne Ortalyq Azııa memleketterine jańa syn-tegeýrinder men qaýip-qaterlerge qarsy turýǵa kómegi týraly habardar bolýdy arttyrýǵa baǵyttalǵan.
BUU-nyń joǵary laýazymdy ókilderiniń sapary 13-14 shildede Astanada ótetin Qaýipsizdik jáne yntymaqtastyq jónindegi Ortalyq Azııa Forýmyna qatysýyna oraılas uıymdastyryldy.