Premer-mınıstr Álıhan Smaıylovtyń tóraǵalyǵymen ótken Úkimet otyrysynda Qazaqstannyń ońtústik óńirleriniń aýyl sharýashylyǵy taýarlaryn óndirýshilerin sýmen qamtamasyz etý máselesi saralandy, dep habarlaıdy Egemen.kz Úkimettiń baspasóz qyzmetine silteme jasap.
Ekologııa jáne tabıǵı resýrstar mınıstri Zúlfııa Súleımenova búkil egindik sýdyń 97%-yn tutynyp otyrǵan Almaty, Jambyl, Qyzylorda jáne Túrkistan oblystaryndaǵy vegetasııalyq kezeń sý tapshylyǵy jaǵdaıynda ótip jatqanyn baıandady.
Almaty jáne Jetisý óńirlerinde sý sharýashylyǵynyń jaǵdaıy turaqty. Sonymen qatar Túrkistan, Qyzylorda jáne Jambyl oblystarynda sý qoımalaryna kelip jatqan sýdyń deńgeıi jetkiliksiz. Sonyń saldarynan sýmen qamtamasyz etýde kúrdeli jaǵdaı qalyptasyp otyr.
Máseleni sheshý úshin Ekologııa mınıstrligi tarapynan Qyrǵyzstan men О́zbekstannyń ýákiletti vedomstvolarymen memleketaralyq nysandardy sýmen qamtamasyz etý kestesin saqtaý boıynsha jumys júrgizilip jatyr.
Sondaı-aq Jambyl oblysynyń ákimi Nurjan Nurjigitov qazirgi jaǵdaı men usynylǵan sharalar týraly baıandama jasady.
Premer-mınıstr memleketaralyq nysandardy sýmen qamtamasyz etý boıynsha kelisilgen kestelerdi saqtaýdyń, sondaı-aq sý resýrstaryn paıdalaný boıynsha kórshiles eldermen birlesken úılesimdi jumystyń mańyzdylyǵyn atap ótti.
Sonymen qatar Álıhan Smaıylov sýdy ysyrap etpeı, jalpy AО́K-ke sý únemdeý tehnologııalaryn engizý úshin elimizdegi gıdrotehnıkalyq qurylystardy rekonstrýksııalaý, jańǵyrtý jáne sıfrlandyrý jumystaryn kúsheıtýdi tapsyrdy.
Sondaı-aq memleketaralyq kanaldar arqyly keletin sýdyń kólemin arttyrý máselesin jedel pysyqtaý qajettigin atap ótti.