Almabaq ishinde adal eńbektiń jemisine kenelip otyrǵan aqsaqal beınesi, urshyq ıirgen qos áje, saǵyndyrǵan kúzgi baq kózge ystyq, kóńilge jyly ushyraıdy. Sýretshi seziminiń názik qylyn terbegen kenep betindegi myń san boıaýlar syrbaz ónerdiń sıqyryna qaraı tartady. Úmit pen kúdikke toly tynymsyz tirshilik alýan oılarmen arpalysqan adam kóńiliniń ishki yrǵaqtaryn tap basqandaı.
Kórermendi ózine baýrap áketetin alyp qýat – keneptegi meıirim shýaǵy. Sezim jańbyryn sirkiretken saǵynysh esken sulbalar. Sýretshi tabıǵat kórinisinen alǵan alǵashqy áserin alǵaýsyz jetkizýge umtylady. Myń qubylǵan ashyq tústi boıaý úndestigin ol aldymen kórip, sodan soń qabyldap baryp boıaý tústeri arqyly kenep betine túsiredi. Bir ólkeniń tamsanarlyq sulýlyǵyn jyldyń ár mezgilinde jalyqpaı beıneleýge bar. Jıenbaı Orynbaevtyń grafıkasyna kompozısııanyń qarapaıymdylyǵy men aıqyndylyǵy, yqshamdylyq, tazalyq, ashyq tús, sulbalardyń naqtylyǵy tán.
Shyǵarmashylyǵy kóp janrly bolǵanymen, sýretshi aýyl taqyrybyn, tabıǵat peızajdaryn jyrlaǵanda talant qýaty tasqyndaı túsetindeı. Onyń qalamyndaǵy aıryqsha baǵalanǵan shoqtyǵy bıik týyndylar osy taqyryptarǵa tıesili. Aýyl kórinisiniń lırıkalyq peızajy men tabıǵattyń sheksiz sulýlyǵy ómirge ásemdik syılaıdy.
«Sýretshi boıaý massasyn teńestirýge, kompozısııanyń barlyq elementterin yrǵaqty uıymdastyrýǵa, álemniń mánerliligin buzbaı, formalardyń ózindik áýenin jasaýǵa tyrysady. О́z avtoportretindegi ashyq bet álpeti men oıly kózderi sýretshiniń rýhanı ishki dúnıesin kórermenmen bóliskendeı. Al «Aýyldaǵy kúz» shyǵarmasynda joǵary qaraı órlegen qazdardyń qımyl-qozǵalys formalarynyń dál beınelenýi baıqalady. Sonymen qatar «Balalyq shaq týraly estelik», «Qurbylar» atty týyndylarynda aq kımeshektegi urshyq ıirip otyrǵan ájelerdiń beınelerinen sonaý balalyq shaqtyń esteligi men týǵan jerge degen saǵynysh sezimi esedi. Sýretshi tabıǵat jaǵdaıynyń nıýanstaryn, syrǵyp bara jatqan sezimtal bir sáttik sulýlyqty náziktikpen qabyldap, lırıktiń kózimen kóredi», deıdi ónertanýshy Laýra Ábildaeva.
Jıenbaı Orynbaev 1962 jyly qazirgi Túrkistan oblysy Saryaǵash aýdanynda dúnıege keldi. Tashkent pedagogıkalyq ınstıtýtynyń kórkemsýret-grafıka fakýltetin támamdady. Kóptegen halyqaralyq jáne respýblıkalyq kórmelerdiń qatysýshysy. О́ziniń shyǵarmashylyq qyzmetin oqytýshylyqpen ushtastyrǵan talant ıesi qazirgi tańda bolashaq qylqalam sheberlerin baýlyp júr.
ALMATY