Qyzylordadaǵy óńirlik kommýnıkasııalyq ortalyǵynda brıfıng ótip, mamandar Kongo-Qyrym gemorragııalyq qyzbasynyń aldyn alý baǵytyndaǵy sharalar týraly baıandady.
Bıyl osy dert shyǵýy múmkin degen 106 eldi meken anyqtalyp, qazir olardaǵy turǵyn úı aýmaqtary men mal qoralaryna kenege qarsy «Kreolın H» eritindisi qoldanylyp otyr. Oblys ákimi apparatynyń «Jumyldyrý jáne shuǵyl jumystar ortalyǵy» KMM dırektorynyń mindetin atqarýshy Baýyrjan Sadyqovtyń aıtýynsha, kóktemgi zalalsyzdandyrý jumystarynyń ortasha tıimdilik kórsetkishi 97,2 paıyzdy quraǵan.
Jańaǵy eldi mekenderde 556 myń mal basy bar. Onyń 117 myńyna preparattar egilip, aýrýǵa qarsy zalalsyzdandyrý jumystary júrgizildi. Oblystyq veterınarııa basqarmasy jumsalatyn preparattardy josparǵa sáıkes aldyrtyp, kezeń-kezeńimen aýdandarǵa jóneltip jatyr.
Oblystyq sanıtarlyq-epıdemıologııalyq baqylaý departamenti basshysynyń orynbasary Álııa Ábdiqaıymovanyń aıtýynsha, ýlaýdan ada-kúde kete qoımaıtyn keneniń órshıtin ýaqyty maýsym men shilde. Qazir qolaısyz dep tanylǵan eldi mekenderden basqa aýmaqtarda da qaýipti aýrýdyń aldyn alý sharalary turaqty júrgizilýde. Ulttyq saraptama ortalyǵy oblystyq fılıalynyń zerthanasynda 2 917 kene synamasy zerttelip, juqpalylyq kórsetkishi 6,5% boldy.
Brıfıngte zııankesterdi boldyrmaýda kese kóldeneń turatyn máseleler de aıtylmaı qalmady. Mysaly, jándikterdi ýlaý úshin tenderdi jumyldyrý basqarmasy ótkizedi. Arnaıy qurylǵan jumys toby merdiger jumysyna dezınfeksııa kezinde tek monıtorıng jasaı alady. Tekserý jasaýǵa eshqaısysynyń quzyreti joq. Al onyń zardabyn búgingideı jaǵdaı ýshyǵa qalǵanda jaýapkershilikti kimnen suraryn bilmegen el tartyp jatady.
Sońǵy jyldary osy máseleni kóterip kele jatqan mamandar problemanyń sheshimi zııankesterdi ýlaýdy jergilikti veterınarııa basqarmasyna berý ekendigin aıtady. Bul jumysty ońaı ári jedel uıymdastyrýǵa múmkindik beretin edi. Biraq bul úkimettik deńgeıde sheshiletin másele.
Áıteýir, bıyl Syrdyń boıyn osy qansorǵysh alabóten býyp tur. Toǵyzynshy shilde kúni kene shaqqan taǵy bir turǵyn kóz jumdy. Otyz eki jastaǵy bul azamat ta Shıeli aýdanynyń turǵyny. Bul – osy jyly oblysta ýly jándiktiń qurbanyna aınalǵan úshinshi adam.
Osymen toqtasa eken...
QYZYLORDA