Qazaqstan Respýblıkasy Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın jumys saparymen Batys Qazaqstan oblysynda boldy.
Mınıstr Ǵarıfolla Qurmanǵalıev atyndaǵy oblystyq fılarmonııa ǵımaratynda óńir jurtshylyǵymen kezdesti. Sondaı-aq Batys Qazaqstan oblysynyń ákimdiginde mınıstrliktiń quzyretine kiretin máseleler boıynsha azamattardy qabyldady.
Baǵdat Mýsın áýeli Batys Qazaqstan oblysy ákiminiń orynbasary Baqytjan Narymbetovpen birge óńirlik Jaiq-Hub keńsesinde bolǵan edi. Mınıstrdiń kelýimen oraılas ashylǵan keńse Astana Hub halyqaralyq tehnoparkiniń bólimshesi retinde qyzmet etpek. Osyǵan deıin elimizdiń bes qalasynda – Taldyqorǵan, Taraz, Qyzylorda, Aqtóbe jáne Semeıde qyzmetin bastaǵan bul ortalyqtyń bólimderi bıyl Qazaqstannyń 17 aımaǵynda ashylyp, jumys bastamaq eken. Bizdiń óńirde de ınnovasııalyq IT-jobalardy damytyp, tıisti mamandardy daıarlaýmen aınalysatyn Jaiq-Hub – jergilikti IT-komıýnıtı – startaptardy, ınvestorlardy jáne mentorlardy bir jerge jınap, múddeles etetin ortalyqqa aınalady dep kútilýde. Bul jerde daıyndalǵan startap-jobalardyń ınkýbasııalyq kezeńinde kásipkerlik álippesin oqytý, ınvestısııa tartýǵa kómektesý, qarjy esebin júrgizý jáne PR-qoldaý jasalady.
– Jaiq Hub Batys Qazaqstan oblysyndaǵy jastar men IT qoǵamdastyǵy úshin tartymdy ortalyq bolady degen senimdemiz. Biz aımaqta Astana Hub bilim berý baǵdarlamalaryn taratýdy, startaptar úshin ınkýbasııalyq baǵdarlamany jáne IT qaýymdastyǵy úshin túrli is-sharalardy ótkizýdi josparlap otyrmyz. Jaiq Hub keńsesiniń ashylýy aımaqtyń IT sektoryn damytýdaǵy mańyzdy qadam bolmaq. Jastardyń armanyn júzege asyryp, IT salasynda tabysqa jetýge kómektesetinine senimdimiz, dedi Astana Hub damý keńsesiniń aımaqtyq dırektory Aıda Dýsova.
Jaiq Hub-tyń óńirlik menedjeri Omarbek Táshimniń aıtýynsha, qazir bul jerde negizinen robottehnıka boıynsha jobalar qolǵa alynyp, IT baǵytynda sabaq beretin kóptegen muǵalim daıyndalǵan. Túlekterdiń arasynda respýblıkalyq jáne halyqaralyq saıystarda júlde alǵan jeńimpazdar da kóp. Buǵan qosa shaǵyn kólemdi FPV-kvadrokopterlerdi arnaıy trassalarda jarystyratyn dron-reısıng mamandary da osy jerde oqytylyp jatyr eken.
– Mundaı drondardyń jyldamdyǵy saǵatyna 250-300 shaqyrymǵa jetedi. Ony basqarý ekiniń biriniń qolynan kelmeıdi. Bul drondy tek arnaıy kózildiriktiń kómegimen basqarýǵa bolady. О́nerdiń bul túri elimizde jańa ǵana jetilip keledi. Halyqaralyq jarysqa qatysyp, júldeger bolǵan qaraǵandylyqtyń jasy 10-da ǵana. Biz osy ónerdi damytyp, sporttyń bir túri retinde halyqqa keńinen tanytqymyz keledi, deıdi «Aspan-dron» seriktestigin qurǵan Aslanbek Ámınov.
Baǵdat Mýsın jastardyń bul talpynysyn barynsha qoldaıtynyn aıtty. IT-tehnologııanyń bul baǵytyn damytý bolashaqta tótenshe jaǵdaılar kezinde, ómirdiń basqa da salalarynda da paıdaly bolýy múmkin. Mınıstrdiń aıtýynsha, osyndaı tosyn da tyń baǵyttarǵa qyzyǵýshylardyń sany artyp keledi, olardy barynsha qoldaý qajet.
Sıfrlyq damý, ınnovasııalar jáne aeroǵarysh ónerkásibi mınıstri Oral qalasyndaǵy Oqýshylar saraıynda robottehnıka úıirmesinde daıyndalatyn 150-den asa oqýshynyń da jetistikterimen tanysty. Sondaı-aq Qarashyǵanaqtaǵy munaı servısin sıfrlandyrý, BQO aýdandaryndaǵy abonent sanyn eseptep, aýyz sý sýbsıdııasyn avtomatty túrde shyǵaratyn jańa júıe sekildi IT-jobalardy kórip, joǵary baǵa berdi.
Budan soń Ǵarıfolla Qurmanǵalıev atyndaǵy oblystyq fılarmonııa ǵımaratynda jergilikti turǵyndarmen kezdesken sala basshysy baılanys, aqparattandyrý, elektrondyq úkimet, memlekettik qyzmet kórsetý boıynsha atqarylyp jatqan jumystardy baıandap berdi.
– Qazir elektrondy úkimettiń eGov mobile mobıldik qosymshasy arqyly 1 myńnan asa qyzmet kórsetiledi. Jaqynda ǵana Prezıdent tapsyrmasyna oraı «Otbasynyń sıfrlyq kartasy» iske qosyldy. Bul model elimizde turyp jatqan barlyq otbasyn qamtıdy. Iаǵnı osy joba aıasynda eldegi 6,3 mln otbasynyń 80 parametrden turatyn aqparaty júıelenip, sıfrlyq qalypqa tústi. Sol arqyly biz ár otbasynda qansha bala bar, olar balabaqshamen qamtylǵan ba, jyljymaıtyn múligi bar ma, tabysy qandaı, t.b. derekterin júıeledik. Biz qazir qolymyzdaǵy búkil aqparatty óńdep, otbasylardy toptarǵa bóldik, endi muqtaj januıalarǵa olar ótinish jazbaı turyp-aq kómektesýdiń tetigi bar. Eger buryn ataýly áleýmettik kómek (AÁK) alý úshin kóptegen anyqtama jınaý qajet bolsa, qazir onyń keregi bolmaı qaldy. Iаǵnı qazir bizdiń azamattarymyz týraly barlyq aqparat qolymyzda tur. Memlekettik áleýmettik kómekti jalǵyz túımeni basyp-aq rásimdeı alamyz. Mysaly, sábı dúnıege kelgende rásimdeletin kóp qujatty qazir úıde otyryp jalǵyz habarlama jiberip retteýge bolady, deıdi Baǵdat Mýsın.
Mınıstrdiń aıtýynsha, elimizde «Sıfrlyq notıarıat» serveri de iske qosylǵan. Bul arqyly kez kelgen otandasymyz ózine qajetti túrli senimhatty notarıýstyń kabınetine barmaı-aq jazdyryp ala alady.
– Biz elektrondy úkimet portalyna medısına salasyndaǵy barlyq aqparatty da shoǵyrlandyryp jatyrmyz. Bul – ár azamat úshin mańyzdy. Bul bazada tipti ár pasıentke jazyp berilgen dári-dármek týraly aqparatqa deıin jınaqtalady. Osy jyldyń sońyna deıin biz bul isti ábden tııanaqtap, barlyq medısınalyq aqparat alaqandaǵydaı kórinip turatyn dárejege jetkizetin bolamyz, dedi sıfrlyq damý, ınnovasııalar jáne aeroǵarysh ónerkásibi mınıstri. О́tken jyly ǵana Memleket basshysy densaýlyq saqtaý salasynyń sıfrlandyrylýy jóninde syn aıtqan bolatyn. Baǵdat Mýsınniń pikirinshe, bul medısına salasyndaǵy túrli júıeniń ózara úılespeýinen bolǵan. Bolashaqta sıfrlyq damý, ınnovasııalar jáne aeroǵarysh ónerkásibi mınıstrligi men densaýlyq saqtaý mınıstrligi tize qosyp, atalǵan kemshilikterdi jedel jóndemek.
Sapar barysynda sıfrlyq sala basshysy oblys ákimi Narıman Tóreǵalıevpen kezdesti. Kezdesý kezinde sıfrlandyrý salasyndaǵy óńirdi damytý boıynsha ózekti máseleler talqylandy. Mınıstr men ákim baılanys pen ınternetti qamtamasyz etý jónindegi jol kartasyna qol qoıdy.
Batys Qazaqstan oblysy