Qurqyltaıdyń uıasyndaı ǵana shaǵyn aýyl Saqtan dep atalady. Talǵar aýdanyndaǵy aýmaǵy jaǵynan eń úlken Qaınar aýyldyq okrýgindegi 12 eldi mekenniń birin quraıdy.
Alaıda aýdan ortalyǵy men iri megapolısten 30 shaqyrymdaı jerde ornalasqan aýyl ishi jolynyń jóndeý kórmegenine 30 jyldan asyp, halyqtyń muń-zaryna aınalǵan. Jyldar boıy sheshimin saryla kútken joldyń «jyry» bıyl bitip, turǵyndardyń júzine qýanysh uıalady. Mundaǵy eńbektegen baladan eńkeıgen qartqa deıin máz-meıram bolyp, tipti aýyl turǵyndary atynan Alıma Ospanova osy bir júrekjardy qýanyshtaryn Prezıdent Qasym-Jomart Toqaevqa joldaǵan eken.
– Bul aýylǵa qonys aýdarǵanymyzǵa alty jyl boldy. Sodan beri osy jol máselesin jyl saıyn aıtyp kelemiz. Turǵyndardyń deni, sonyń ishinde ózim de Almaty men О́tegen batyr kentine, Talǵarǵa qatynap jumys isteımiz. Jaýyn-shashynda aıaǵymyz batpaqqa batsa, ashyq kúnderi borpyldaq shańǵa kómiletinbiz. Sodan keıin bala-shaǵaǵa aıaq kıim de shaq kelmeıtin. Osy máseleni aıtyp 2019 jyly aýyl turǵyndary atynan oblys ákimine «jolymyzdy jóndep berse» degen hat joldaǵan edik. Kóp uzamaı jaýabymyzdy aldyq. Onda qarjy bólinetini týraly aıtylǵan. Alaıda sol kezdegi koronavırýs pandemeıasyna baılanysty karantın bastaldy. Odan keıingi jyldary oblysymyz ekige bólindi, osylaısha, kótergen máselemiz kúrmeýli kúıde qalyp qoıǵan. Sosyn bıyl turǵyndar jınalyp Memleket basshysy Qasym-Jomart Toqaevtyń atyna ótinish hat joldadyq. Nátıjesinde, Prezıdent Ákimshiliginen janǵa jaǵymdy jaýap aldyq. Kóp uzamaı mine, kóshelerimizge asfalt tóselip, Qurban aıttyń sońǵy kúnderinde jarqyraǵan jańa, tegis jolmen júrip aıttadyq. Turǵyndar qýanyshynda shek bolmady. Qarapaıym aýyl turǵyndarynyń bir aýyz ótinishine qulaq asyp, kóńil bólgeni úshin Memleket basshysyna ózimniń jáne turǵyndardyń atynan alǵysymdy jetkizdim, – deıdi Saqtan aýylynyń turǵyny Alıma Ospanova.
«Halyq únine qulaq asatyn memleket» tujyrymdamasynyń arqasynda aýyldyń ajary ashylyp, kórki kirgenine turǵyndardyń úlken-kishisi kýá.
– Buryn úıden uzamaıtyn nemerelerimiz ben balalarymyz kóshege velosıped, samokattaryn súırep shyǵyp, aýyl ishi máz-meıram kúıge bólendi. Bir-birimen aralasyp, oınap, jaz kúnderin kóńildi de qyzyqty ótkize bastady. Burynǵydaı kedir-budyr, oı-shuqyry joq, asfalttalǵan jolmen júrý úlkenderdiń de eńsesin tiktep, júzderin jadyratty, – deıdi úsh nemereniń ájesi Alıma Ospanova.
Memleket basshysy Qasym-Jomart Toqaevtyń 2022 jylǵy 1 qyrkúıektegi «Ádiletti memleket. Birtutas ult. Berekeli qoǵam» atty Qazaqstan halqyna Joldaýynda dál osy aýyl joldarynyń problemasyna basa nazar aýdarǵan bolatyn.
«Avtojol qurylysyna, sonyń ishinde jergilikti joldardyń sapasyna basa mán berý kerek. Bıýdjetten qyrýar qarjy bólinse de, bul másele áli sheshimin tappaı otyr. Men 2025 jylǵa deıin jergilikti joldardyń keminde 95 paıyzyn jaqsartý jóninde tapsyrma berdim. Úkimet bul máseleni tikeleı baqylaýǵa alsyn. Jol qurylysyndaǵy zańsyzdyqtardy anyqtaý qajet. Bul jumystan naqty nátıje shyǵarý kerek», degen edi Prezıdent sol Joldaýynda.
Saqtandyqtardyń búgingi qýanyshy – osy Prezıdent tapsyrmasynyń júzege asýynyń aıqyn bir kórinisi.
– Qaınar aýyldyq okrýgine qarasty Saqtan aýylynda 219 turǵyny bar 39 aýla tirkelgen. Negizinen turǵyndar sany 300-den asady. Uzyndyǵy 2 shaqyrymdyq ortalyq kósheniń asfalttanýyn turǵyndar on jyldan beri kútken. Bıylǵy jyldyń birinshi jarty jyldyǵynda osy ortalyq kóshege asfalt tóseldi. Jyl basynda aýyldyń eski elektr baǵandary jańaǵa aýystyryldy. Aldaǵy ekinshi jarty jyldyqta ortalyq kósheni, ıaǵnı 2 shaqyrym kósheni jaryqtandyratyn 60 baǵana qoıylady. Memlekettik satyp alý qorytyndysyna sáıkes merdiger anyqtaldy, bir-eki aı kóleminde jumys jasalady, – deıdi Qaınar aýyldyq okrýgi ákiminiń orynbasary Nurbol Esenbaev.
Bulttan shyqqan kúndeı júzderi jaınaǵan Saqtan aýylynyń turǵyndary endigi kezekte tym bolmasa Qulja kúrejolyna jetkizetin qoǵamdyq kólik pen aýylǵa gaz tartý, mektep salý máselesi de eskerilse degen tilekterin aıtyp qaldy.
Almaty oblysy