Senat jáne Májilis depýtattary aımaqtarǵa sapary barysynda áleýmettik nysandardyń jaı-kúıimen tanysty. Olar aımaq turǵyndarynyń muń-muqtajyn tyńdap, keleli máselelerdi sheshýge atsalyspaq.
Májilis depýtattary Amantaı Jarqynbek pen Nurjan Áshimbetov jumys saparymen Pavlodar oblysyna baryp, Aqsý qalasyndaǵy birqatar áleýmettik nysannyń qurylysymen tanysty.
Májilismender Aqsý qalasyna qarasty Pogranıchnık aýylyna sapary barysynda problemalyq nysanǵa aınalǵan feldsherlik ambýlatorııa men dene shynyqtyrý-saýyqtyrý keshenderin aralady. Qazirdiń ózinde olardyń qurylysy bekitilgen kesteden keshigip jatyr. Ambýlatorııa merdigeri onyń merziminde iske qosylatynyn aıtty. Degenmen depýtattardyń pikirinshe, joba tolyqtyrý men túzetýdi qajet etetindikten, jumys kólemi artýy múmkin.
Sonymen qatar depýtattar Aqsý qalasyndaǵy magıstraldyq jáne taratýshy jylý jelilerin qaıta jańǵyrtý jumystarymen tanysty. Májilismender Jumyspen qamtýdyń jol kartasy aıasynda qurylysy 2021 jyly bastalǵan Muz saraıynda da boldy. Búginde onyń irgetasy ǵana quıylǵan, qurylys áli sozylyp jatyr. Sapar sońynda depýtattar azamattardy qabyldap, talap-tilekterin tyńdady. Turǵyndar jaıylym jerlerge qatysty saýaldaryn qoıdy.
* * *
Senat depýtattary Janbolat Jórgenbaev, Gennadıı Shıpovskıh, Zakırjan Kýzıev Almaty oblysyna bardy. Depýtattar Qonaev qalasyna sapar barysynda sýarý júıesin jańǵyrtý jónindegi qurylys jumystarynyń barysymen tanysyp, sý paıdalanýshy sharýashylyqtardyń ókilderimen kezdesti.
Sý paıdalaný sharýashylyqtarynyń ókilderimen kezdesý barysynda senatorlar sýmen jabdyqtaýǵa, sý jınaý qurylystaryndaǵy sanıtarlyq-qorǵaý aımaqtaryn kútip ustaýǵa, sý sharýashylyǵy obektilerin tazalaýǵa jáne kúrdeli jóndeýge baılanysty ózekti máselelerdi talqylady.
Senatorlardyń sapary Ile aýdanynda odan ári jalǵasty. Onda senatorlar Qaraoı aýyldyq okrýgine tıesili «Shala» jáne «Quralas» arnalarynyń jaı-kúıimen, Ashybulaq aýyldyq okrýgindegi tazartý qurylysynyń barysymen tanysyp, sý paıdalaný sharýashylyqtarynyń ókilderimen kezdesti.
* * *
Májilis depýtattary Erbolat Satybaldın men Amanjol Áltaı Ulytaý oblysynyń Jezqazǵan qalasyna qarasty Keńgir kentinde ornalasqan qus fabrıkasy qurylys onyń jumysymen tanysty.
«Ahtıamov» sharýa qojalyǵy – «Amanat» partııasynyń Saılaýaldy baǵdarlamasyn oryndaýdyń Jol kartasyndaǵy nysandardyń biri. Sondyqtan onyń sapaly ári óz ýaqytynda aıaqtalýyn partııa óz baqylaýynda ustap otyr. Fabrıka qus eti, jumyrtqa jáne qurama jem óndirýmen aınalysady.
О́ńirge arnaıy barǵan Májilis depýtattary fabrıkanyń jumysymen tolyq tanysyp shyqty. Oblysta qus ónimderin tutynýy 3 500 tonna bolsa, bul fabrıka sonyń 30 paıyzyn óteıdi. Bul jergilikti ónim óndirip, ony naryqqa shyǵarý úshin úlken múmkindik beredi.
* * *
Senat depýtattary Ernur Áıtkenov pen Altynbek Nýhuly Ekibastuzdaǵy jylý energetıka ortalyǵyna baryp, jóndeý-qalpyna keltirý jumystarynyń barysymen tanysty.
Depýtattar JEO-da jóndeý-qalpyna keltirý jumystary júrip jatqan ýchaskelerdi qarady jáne jylý berý maýsymyna daıyndyq úderisine kýá boldy. Stansada barlyq 10 qazandyqty jóndeý qarastyrylǵan, onyń ishinde 8 qazandyqta kúrdeli jóndeý jumystary jasalady. Sý jylytatyn 5 qazandyqqa bıýdjet qarjysy esebinen kúrdeli jóndeý júrgiziledi. Sondaı-aq 5 energetıkalyq qazandyqty, qosalqy jabdyqtardy, ǵımarattar men qurylystardy kúrdeli jáne aǵymdaǵy jóndeý jumystaryn jasaý josparlanyp otyr.
* * *
Májilis depýtattary Erkebulan Mámbetov pen Dmıtrıı Koloda Soltústik Qazaqstan oblysynyń Petropavl qalasyna bardy. Onda Manash Qozybaev atyndaǵy Soltústik Qazaqstan memlekettik ýnıversıtetindegi jataqhana máselesin talqylady.
1 200 orynǵa arnalǵan eki stýdenttik jataqhana Petropavl qalasynyń ortalyǵynda oqý orny 500 metr qashyqtyqta ornalasady. Qurylys belsendi qarqynmen júrip jatyr, qazir nysanda 90 adam jumys isteıdi, merdiger – jergilikti «Osnovanıe» JShS. Merdigerdiń aıtýynsha, jataqhana 2024 jyldyń tamyzyna deıin daıyn bolady. Qurylystyń alty aıǵa keshiktirilýiniń sebebi – tenderdiń basqa qatysýshysynyń daýlasýyna baılanysty sot prosesi ótken.
«Jylý men sý bolmasa, obekt iske qosylmaıdy. Biz Petropavl ákimdiginen jaqyn jerde ornalasqan úsh úıdi satyp alý kerek degen mardymsyz jaýap aldyq. Eger qarasha-jeltoqsan aılarynda ınfraqurylym jasalmasa, onda merdigerdiń paıdalanýǵa berilýi áli belgisiz ýaqytqa keshiktiriledi. Ol qysta ishki jumystardy júrgize almaıdy», dedi Erkebulan Mámbetov.
* * *
Senat depýtaty Amangeldi Tolamısov Shyǵys Qazaqstan oblysynda bolyp, aımaq turǵyndarymen kezdesti.
Senator óńirge sapar barysynda Abaı oblysynyń Aıagóz aýdanyndaǵy birqatar áleýmettik nysandardy aralady, emhanalardyń jumysymen, qala qurylysyndaǵy problemalarmen tanysty.
«Senattyń qazirgi kezdegi negizgi mindetteriniń biri óńirlerdiń múddesin bildirý. Osyǵan baılanysty bizdiń jumysymyzǵa jergilikti mańyzy bar problemalyq máselelermen tanysý asa mańyzdy. Sondyqtan óńirlerdiń turǵyndarymen mundaı kezdesýlerdiń bizge kómegi zor. Sizder kótergen barlyq máselelerdi udaıy baqylaýda ustaıtyn bolamyz», dedi senator.
Senator sonymen qatar óńirdegi «Jaıly mektep» jobasyn iske asyrý barysymen de tanysty.