2023 jyldyń 13 shildesinde Samruk-KazynaConstruction Basqarma Tóraǵasy Máýlen Aımanbetov Qaraǵandyǵa jáne oǵan irgeles aýyldarǵa issaparmen baryp, «Jaıly mektep» ulttyq jobasy aıasynda jańa mektepterdi salatyn merdiger kompanııalardyń ókilderimen júzdesti, dep habarlaıdy Egemen.kz.
Kezdesýler qurylys alańdarynda ótti. Talqylaý barysynda Máýlen Aımanbetov merzimderdi keshiktirgen kompanııalarǵa qandaı jaýapkershilik qarastyrylǵanyn taǵy bir eske saldy.
«Apta saıyn atqarýshylyq tehnıkalyq esepterdi ýaqytyly tapsyryp otyryńyzdar. Kem degende eki ret merzimderdi buzyp, jumystardy keshiktirgen jaǵdaıda shartty buzamyz. Al jobany konkýrsta ekinshi oryn alǵan kompanııaǵa beremiz. Men sizderdi eskertemin: baqylaý qatań bolady! Biz sapaǵa basymdyq beremiz», dedi Aımanbetov.
Eger merdiger qurylys jumystaryn oryndaý merzimin bekitilgen kesteden kem degende eki ret 7 kúnnen artyq ýaqytqa keshiktirse, kelisimshart birjaqty tártippen buzylady. Al mekteptiń qurylysy konkýrsta ekinshi oryn alǵan kompanııaǵa beriledi. Ol talaptarǵa saı kelmegen jaǵdaıda, jańa merdiger bir kózden satyp alý arqyly anyqtalady. Barlyq jaıly mektepterdi ýaqytyly salyp, tapsyrý úshin osyndaı qatań sharalar qabyldanyp jatyr.
Qaraǵandydaǵy Keńdala shaǵyn aýdanynda 2000 oryndyq jaıly mektep salý josparyn talqylaý kezinde Máýlen Aımanbetov mektep keńistigin ońtaılandyrýǵa qatysty óz usynystaryn aıtty. Irgeles aýmaqta trıbýnalary bar kóp fýnksıonaldy stadıon ornatylady dep josparlanǵan. Kún jyly kezde oqýshylar fýtbol, al qysta hokkeı oınaı alady. Tóraǵa ázildep, jaıly mektepter qaraǵandylyq «Saryarqa» hokkeı klýby úshin sportshylardy daıarlaýǵa yqpal etetinin erekshe atap ótti.
«Mektep aýmaǵynyń ár sharshy metrin barynsha tıimdi paıdalaný kerek. Eýropalyq mektepterde bos oryn joq. Máselen, nege aýmaqta aınalmaly júgirý jolaǵyn jasamasqa? Ol úshin arnaıy oryn qarastyrýdy usynamyn. Qysta shańǵy tebýge, al jazda júgirýge bolady. О́zim de mektepte oqyǵanda júgirýmen aınalystym, normatıvtiń birinshi razrıadyn alǵanmyn. Buryn árdaıym mektep aınalasynda júgiretinbiz», dedi Aımanbetov.
«Jaıly mektep» ulttyq jobasy aıasynda Qaraǵandy oblysynda 18 bilim berý nysany salynady. 10 jaıly mekteptiń qurylysy bıyl bastalady. Bul mektepter 2024 jyldyń sońyna deıin paıdalanýǵa beriledi. Ulttyq jobanyń arqasynda oblys boıynsha 12,5 myń qosymsha oqýshy orny qurylady. Olardyń 7 myńnan astamy 2024 jyldyń sońyna deıin ashylady.
Paıdalanýǵa berilgennen keıin barlyq jaıly mektepter jergilikti atqarýshy organdardyń balansyna ótedi. Osylaısha, jańa bilim berý nysandary memleket menshiginde bolady, ıaǵnı oqytý tegin júrgiziledi degen sóz.
«Jaıly mektep» pılottyq ulttyq jobasy el Prezıdentiniń tikeleı tapsyrmasy boıynsha júzege asyrylyp jatyr. Joba apatty mektepterdi joıýǵa, úsh aýysymdy oqytý jáne oqýshy oryndarynyń tapshylyǵy máselelerin sheshýge baǵyttalǵan. Ulttyq joba aıasynda 2025 jyldyń sońyna deıin el boıynsha 369 zamanaýı mektep salynady. Bul 740 myń jańa oqýshy ornyn qurýǵa múmkindik beredi.