Bıyl elordadaǵy biregeı óner ordasy – Astana Balet teatryna 10 jyl toldy. Osy jyldar ishinde teatr repertýary túrli janrdaǵy otandyq jáne álemdik aıtýly horeografııalyq qoıylymdarmen tolyǵyp, kórermender kóńilinen oryn aldy. О́tken jumada atalǵan óner ordasy mereıtoılyq maýsymyn Astana Ballet Gala konserti qorytyndylady. Mádenıet jáne sport mınıstrliginiń qoldaýymen ótken mýzykalyq keshte teatrdyń 10 jyldyq tarıhynda sahnalanǵan úzdik týyndylardan úzindiler usynyldy.
– Bizdiń teatrymyz – el óneriniń damýyna zor úlesin qosyp júrgen daryndy ártisterdiń, horeograftardyń, ustazdardyń kórkem oılary men arman-muratyn iske asyratyn kıeli óner ordasy. Maqsatymyz – kórermender senimin aqtaıtyn baǵdarlama usyný. Munda ónerge degen qushtarlyǵymyz, mahabbatymyz kórinis taýyp, ártisterdiń talantyna kýá bola alasyz. Biz teatrdy jaqsy kóretin jurtshylyqtyń kóńilinen shyǵý úshin ár detalge muqııat nazar aýdaramyz,– deıdi teatr dırektory Aleksandr Sovostıanov.
Merekelik konsertte teatrdyń talantty ártisteri «Korsar», «Spartak», «Karmen-sıýıta», «Mahabbat týraly ańyz», taǵy basqa da klassıkalyq jáne neoklassıkalyq spektaklderinen, brazılııalyq horeograf Rıkardo Amaranteniń «Diversity», «Love Fear Loss», «A Fuego Lento» týyndylarynan, avtorlyq jáne ulttyq baletterden úzindiler kórsetti. Bulardy teatr qazynasyn baıytyp, abyroıyn asyrǵan qoıylymdar dep aıtýǵa bolady. Sondaı-aq «Shyǵys rapsodııasy» jáne «Uly dala murasy» konserttik baǵdarlamasyna engen horeografııalyq mınıatıýralar kórermenderdi keremet áserge bóledi. Maestro Arman Orazǵalıevtiń jetekshiligindegi teatrdyń sımfonııalyq orkestriniń oryndaýyndaǵy kompozısııalar tyńdarman júregin tolqytty.
«Teatrymyzdyń tarıhy – sońǵy on jyldaǵy otandyq horeografııa óneriniń damý jylnamasy. Búgingi keshtegi baǵdarlamanyń mańyzy óte zor. Sebebi bul bizdiń biregeı shyǵarmashylyǵymyzdyń úlgisi ispetti. Osy on jyl ishinde sahnalanǵan úzdik týyndylarymyzdan úzindiler kórsetip, kórermenge umytylmas emosııa syılaýdy maqsat ettik», deıdi horeograf Aıgúl Tátı.
Shynynda da, onjyldyq asýdy jemisti baǵyndyrǵan balet teatrynda ótken ǵajaıyp kesh – oryndaýshylyq tehnıka men mýzyka úılesim tapqan shynaıy óner týyndysyna aınaldy.