Parlament Májilisiniń depýtaty, zańger Baqytjan Bazarbektiń kazınoda otyrǵan sýretteri jurttyń nazaryna ilikti. Jeli qoldanýshylary bul sýretterdi qyzý talqylap, depýtatty synap otyr, dep habarlaıdy Egemen.kz.
Depýtat bul sýretterge qatysty túsinikteme berip, halyqty tek obektıvti aqparatqa senýge shaqyrdy.
«Kazınodaǵy sýretterime qatysty pikir bildirgim kelip otyr. Obektıvti aqparatqa senýge jáne jalǵan aqparatqa berilmeýge keńes beremin. Foto 7 aı buryn, dálirek aıtsaq, 2022 jyldyń 24 jeltoqsanynda Qonaev qalasyndaǵy kazınoda túsirildi, onda jubaıym ekeýmiz bir tanymal toptyń konsertine barǵan edik. Ol kezde men Májilis depýtaty emes edim. Sýrettegi fonǵa nazar aýdarsańyzdar, shyrsha turǵanyn baıqaýǵa bolady, meniń ústimde de qysqy jempir. Dostar, men lýdoman emespin, eshqashan kazınoda oınaǵan emespin», dep jazdy Baqytjan Bazarbek Facebook paraqshasynda.
Depýtattyń oıynsha, bul sýretter onyń atyna, depýtattyq mansabyna daq keltirý maqsatynda tarap ketken.
«Parlament Májilisine deıin men kásibı kommersııalyq jer zańgeri bolǵan edim, ómirimde eshqashan memlekettik qyzmette jumys istep kórmegenmin jáne kommersııalyq zańger retinde ýaqytymdy qalaı jáne qaıda ótkizgenim jeke isim dep sanaımyn. Biraq meniń Parlament Májilisindegi belsendi áreketterimnen keıin 7 aıdan soń bireýdiń osy jeke sýretterdi jarııalaýy kezdeısoq emes jáne onyń ózindik sebepteri bar. Májilis trıbýnasynan elimizdegi jer qatynastaryna qatysty másele kótergenim belgili. 8 oblys ákimdiginiń jeke turǵyn úı qurylysyna ınjenerlik jelilerdi júrgizýge bólingen 26 mıllıard teńgeni ıgermeý jáne maqsatsyz paıdalaný máselesin kópshilik aldyna shyǵardym. Parlament trıbýnasynda Úkimetten memlekettik jer kadastryn ashyp, barlyq jer ıeleri men jer paıdalanýshylardyń esimderin jarııalaýdy talap ettim. Úkimettiń qarsylyǵyna qaramastan, bul usynysty zańsyz shyǵarylǵan aktıvterdi qaıtarý týraly zań jobalaryna jáne jaıylym máseleleri boıynsha engizdim
Meniń depýtat retinde kazınoda bolǵanym týraly jalǵan aqparatty taratýshylardyń basty kózdegen maqsaty - halyq aldynda bedelimdi túsirý, meni qaralaý jáne osylaısha jer qatynastaryndaǵy sybaılas jemqorlyqqa qarsy kúsh-jigerimdi azaıtý. Bul - taza arandatýshylyq», dep jazdy depýtat.