Almatyda halyqtyń áleýmettik osal toptaryna jatatyn otbasylardyń balalary lagerge tegin joldama alǵan edi. Aqyr sońynda lagerge «jazǵy demalysym áserli ótedi» degen oımen barǵan balalar saýna ǵımaratynda túnegen, dep habarlaıdy Egemen.kz.
Bul týraly lagerge attanǵan oqýshynyń týysy Inka Rokerovna Facebook paraqshasynda jazdy.
- «Arman dala» lagerinde keleńsiz jaǵdaı bolyp jatyr. Halyqtyń áleýmettik jaǵynan osal toby sanatyndaǵy otbasylardyń balalary tegin demalysqa jiberildi. Uıymdastyrýshylar balalardyń uıaly telefondaryn alyp qoıǵan, ata-analar balalarymen habarlasa almaǵan. Múlde jeldetilmeıtin ǵımaratta 100 bala jatyr. Balalar edende uıyqtap jatyr, dep jazdy Inka Rokerovna.Bul oqıǵaǵa basqa da ata-analar kýá bolǵanyn jasyrmady.
Almaty qalalyq bilim basqarmasy keleńsiz jaıtqa qatysty túsinikteme berip, tıisti sharalar qabyldanyp jatqanyn alǵa tartty.
«Bilim basqarmasynyń qyzmetkerleri shuǵyl túrde «Arman dala» saıajaıyna bardy. Qazir bilim basqarmasy atalǵan uıymmen kelisimshartty buzý máselesin qarastyryp jatyr. Balalar úılerine jiberildi. Jaqynda olar bekitilgen erejelerdi qatań saqtaıtyn balalar lagerine qaıta jiberiledi», delingen qalalyq bilim basqarmasy taratqan habarlamada. Halyq narazylyǵyna sebep bolǵan oqıǵa Almaty prokýratýrasynyń nazaryna da ilikti. Endi balalardyń jazǵy demalysyn uıymdastyrýmen aınalysqan «BelRıchı» JShS qyzmeti jan-jaqty tekseriledi.Osy tusta qylmystyq isterdi tergeý Almaty qalalyq sybaılas jemqorlyqqa qarsy qyzmetke júkteldi.
Isterdi tergep-tekserý aıasynda oqıǵanyń barlyq mán-jaıy anyqtalyp, jergilikti atqarýshy organnyń laýazymdy tulǵalary men lagerdi uıymdastyrýshylardyń áreketine tıisti baǵa beriledi.