Senatorlar sapary

Senator «Aqtaý teńiz porty AEA» AQ-da bolǵan kezde arnaıy ekono­mıkalyq aımaqtyń jumysymen jáne ony odan ári damytý josparymen tanys­ty. Depýtat ekonomıka salalaryndaǵy qoldaý sharalaryna túsinikteme berip óńdeý ónerkásibin odan ári da­mytýǵa baǵyttalǵan negizgi tetikterge toq­taldy.

«Aqtaý teńiz porty» arnaıy ekono­mıkalyq aımaǵy óńirdegi ónerkásip draı­veri. Aımaqqa jyl saıyn shetelden ınvestorlar kóbirek kelýde jáne jańa jumys oryndaryn ashýǵa qo­sym­sha serpin beredi», dep atap ótti Orynbasarov.

Depýtat sapar barysynda «Atameken» óńirlik kásipkerler palatasynyń bas­shylyǵymen de kezdesti. Kezdesýde ká­sipkerlik salasyn damytý, otandyq jáne sheteldik ınvestorlardy tartý má­se­le­leri talqylandy. Senator son­daı-aq ártúrli problemalyq másele bo­ıynsha turǵyndardy da qabyldady.

Depýtat «Kaspıı tushylandyrý zaýyty» JShS-de bolyp, tushy­landyrý zaýytyn keńeıtý jobasymen tanysty. Zaýytta jańǵyrtý jumystary aıaq­tal­ǵan­nan keıin táýligine 40 myń tekshe metr teńiz sýyn tushytýǵa múmkindik beretini aıtyldy. Bekbol Orynbasarov atalǵan kásiporynnyń mańyzdylyǵyn atap ótip, jóndeý-ornatý jumystarynyń jaqyn arada sátti aıaqtalatynyna senim bildiretinin jetkizdi.

* * *

Senat depýtattary Nurlan Beknazarov pen Aıgúl Qapbarova Shymkent qalasyndaǵy júrek aýrýlaryn emdeıtin ortalyqta boldy. Bul uıym eldiń ońtústik aımaǵyndaǵy jetekshi klınıka sanalady jáne 20 jyldan astam ýaqyt jumys istep keledi.

Kezdesý barysynda medısınalyq mekeme ókilderi senatorlarǵa klı­nı­kanyń qyzmeti týraly aıtyp, otan­dyq medısınanyń qazirgi deńgeıi búırek, baýyr, júrek, ókpe, uıqy bezin trans­plan­tasııalaýǵa múmkindik bere­ti­nin atap ótti.

Sonymen qatar dárigerler Qazaq­standaǵy donorlardyń azdyǵy medı­sınalyq transplantasııany damytý men adamdardyń ómirin saqtap qalýǵa kedergi bolyp kele jatqanynyna nazar aýdardy. Bul máseleniń syndarly jáne zańnamalyq turǵyda sheshimi tabylýy kerek.

Senator Aıgúl Qapbarova donorlar tapshylyǵy shyn máninde, kúr­de­li jaǵdaı ekenine toqtala kelip, mun­daı mańyzdy máseleler Parlament Se­na­tyn­da da jan-jaqty zerdelenetinin atap ótti. Al Nurlan Beknazarov medı­sı­na salasyndaǵy ózekti máseleler árqashan parlamentshilerdiń erekshe baqylaýynda ekenin aıtty.

«Parlament Senaty densaýlyq saqtaý salasyn damytýǵa erekshe nazar aýdaryp otyrady. Jyl saıyn respýblıkalyq bıýdjetti jasaqtaý kezinde densaýlyq saqtaýǵa bólinetin qarjynyń jetkilikti kólemde ulǵaıtýdy qadaǵalaımyz. Memleket medısına qyzmetkerlerin áleýmettik qorǵaý men qoldaýdy kúsheıtý jóninde sharalar júrgizip keledi. Memleket basshysynyń tapsyrmasy boıynsha jyl saıyn medısına qyzmetkerleriniń jalaqysy kóterilýde», dedi senator Nurlan Beknazarov.

* * *

Senator Janbolat Jórgenbaev Almaty oblysy Qarasaı aýdanyndaǵy «Úshqońyrırrıgasııa» memlekettik sý sharýashylyǵy kommýnaldyq kásip­ornynda sala mamandarymen jáne fermer sharýashylyǵynyń ókilderimen kez­desti.

Senator kezdesý barysynda sý paı­dalanýshylardyń jaǵdaıymen tanysyp, sala sarapshylarynyń pikirin tyńdady. Mamandar aýdandaǵy agrar­lyq salanyń negizgi problemalyq máse­lelerin, onyń ishinde sýarý jelileriniń tozýy men isten shyǵýyna qatysty taqy­ryptardy kóterdi.

Munan keıin senator Jambyl aýda­nyndaǵy «Sorbulaq» sýarmaly alqa­byn­daǵy sý sharýashylyǵy mamandarymen de kezdesti. Fermerler depýtatqa Sorbulaq kólinde sý jınaý máselesi týraly aıtyp berdi. Jazǵy kezeńde qalanyń sarqyndy sýy «Qos Rýh» arnasy arqyly Ile aýdanyndaǵy 3,5 myń ga jerin sýarý úshin, sondaı-aq «Sorbulaq» sý qoımasynan sorǵy stansalary arqyly Jambyl aýdanyndaǵy 2,5 myń ga jerdi sýarý úshin paıdalanylady. О́simdikterdiń ósip-óný kezeńinde sý qoımasyna keletin sý kólemi burynǵy qalpynda bolady jáne kóldegi sý kóle­mi ǵana azaıady. Sarapshylardyń piki­rinshe, eger sý máselesi sheshilse, bul ónimniń ónimdiligi artady jáne ýaqyt únemdeledi.

«Bul aýqymdy másele. Osyǵan baılanysty Ekologııa mınıstrliginiń Tabı­ǵatty qorǵaý retteý komıteti sýa­rýǵa sarqyndy sýdy paıdalanýdy esepteý ádistemesin ázirleý jóninde jos­­parly jumys júrgizýge tıis. Bizdiń min­detimiz – sýarmaly jerlerdiń aýma­ǵyn ulǵaıtý, ylǵal únemdeıtin tehnologııany qarqyndy engizý bolyp tabylady. Memleket fermerlerge sýbsıdııalar men nesıeleýdiń tıimdi sharttaryn usynyp otyr. Bul múmkindikti tıimdi paıdalanýymyz kerek», dedi Janbolat Jórgenbaev.