Qazaqstan Prezıdenti Qasym-Jomart Toqaev Saýd Arabııasynda ótip jatqan «Ortalyq Azııa + Shyǵanaqtaǵy arab memleketteriniń yntymaqtastyq keńesi» birinshi sammıtine qatysyp, sóz sóıledi, dep habarlaıdy Egemen.kz Aqordaǵa silteme jasap.
Sammıt barysynda Memleket basshysy ınvestısııalyq yntymaqtastyqty jandandyrý qajet ekenin nazarǵa saldy. Prezıdenttiń aıtýynsha, Qazaqstan ınvestısııalyq baılanystardy odan ári arttyrýǵa múddeli.
«UNCTAD baıandamasyna sáıkes, ótken jyly ǵana Ortalyq Azııaǵa taza ınvestısııalar aǵyny 40%-ǵa artyp, 10 mlrd dollardy qurady, onyń 60%-y Qazaqstanǵa tıesili. Táýelsizdik jyldary Shyǵanaq elderi Qazaqstan ekonomıkasyna shamamen 3,6 mlrd dollar saldy. Sondyqtan biz ınvestısııalyq baılanystardy arttyrýǵa múddelimiz», dedi Qasym-Jomart Kemeluly.
Osy tusta Memleket basshysy Qazaqstanda ekonomıkany ártaraptandyrýǵa, onyń ishinde sheteldik kapıtal salymdary úshin neǵurlym qolaıly jaǵdaı jasaýǵa baǵyttalǵan aýqymdy ekonomıkalyq reformalar júrgizilip jatqanyn tilge tıek etti.
«Aıta ketsem, jaqynda Qazaqstan men Saýd Arabııasy qurǵan Iskerlik keńes eki eldiń saýda jáne ınvestısııalyq áleýetin iske asyrý úshin mańyzdy alań bolýǵa arnalǵan. Biz Yntymaqtastyq Keńesiniń barlyq múshe memleketterimen yntymaqtastyqtyń uqsas tetikterin iske qosýǵa daıynbyz», dedi Memleket basshysy.
Osyǵan oraı Prezıdent Qazaqstan áriptesterin «Astana» halyqaralyq qarjy ortalyǵynyń ozyq quraldaryn belsendi paıdalanýǵa shaqyrdy.