«Kesh»: rejısser túsirgen sýretter

Jańa albomǵa keıingi 4-5 jylda túsirilgen sýretter enip otyr. Onyń ishinde kıno alańynan, Qazaqstannyń jáne dúnıejúziniń ár túkpirinen – Meksıkada, Venada, Parıjde, basqa da qalalarda túsirilgen sátter bar. Atalǵan fotoalbom «Lantar books» baspasynan jaryq kórdi.

Eske salsaq, rejısser-fotograftyń «Dosta­rym­nyń portretteri» degen albomy mádenı ortada rezonans týdyrǵan edi. Sondaǵy avtordyń dosy – kitap. Dárejan О́mirbaev kitapty kóp oqıtynyn bilemiz. Sol albomǵa jeke kitaphanasynan alynǵan, súısine oqyǵan 100-den asa kitaptyń portretin jasaǵan. Albomnyń oń jaǵyndaǵy betinde kitaptyń fotoportreti, sol jaǵynda kitaptan alynǵan eń mańyzdy degen úzindi bar. Qyzyq. Tańdanbasqa sha­rań joq. Álemde adamdardyń, jan-janýarlar men qustardyń, gúlderdiń portreti jasalatyny sózsiz. Al kitaptyń portretin jasap, fotoalbomǵa jınaqtaý sırek kezdesedi. Elimizde mundaı jobany áli eshkim túsirgen joq. Endi bir jaǵynan bul kitaptar álemin nasıhattaýdyń ádemi nusqasy bolyp tur.

Osy ıdeıa avtorǵa qaıdan keldi deısiz ǵoı. Ol bir suhbatynda aıtady: «Úıde Pol Sezannyń albomy bar edi. Birde sol kitaptyń ústine qyzym ádemi almany qoıyp ketipti. Sony túsirip aldym. Jeke bir obraz. Kitaptar da adam sııaqty ǵoı. Pýshkın kezinde sóredegi kitaptaryna qarap: «Qosh bolyńdar, dostarym», dep qoshtasypty deıdi. Árbir kitaptyń ózindik bir álemi, obrazy bolady. Nege sol álemdi tek oqyp qana qoımaı, sýretke túsirmeske». Iá, avtordyń oıynsha jaqsy shyqsa, árbir túsirilgen sýret kishkentaı fılm sııaqty. Árıne, mundaǵy basty talant – kózqaras pen talǵam. Kókirek kóz­diń árqashan shyǵarmashylyq baǵytta estetıkalyq núktede ómirdiń túrli sátteri men boıaýlaryn baıqap, «ustap» alýy – sheberlik. Ásirese qazirgideı qazaq qoǵamynyń fotoalbom janryn qabyldaı da, túsine de almaı jatqan tusynda osyndaı jınaqtardyń el ishine keńinen jaıylyp, kózaıymǵa aınalýy kerek-aq.