Qyzylordalyq jastar 5 jylda 11 otbasyǵa baspana syılady. Oǵan qajetti jer telimin jergilikti ákimdik úlestirip bergen. Osylaısha, maqsat pen múddesi bir 150-ge jýyq azamat eldiń ósip-órkendeýine ózinshe úles qosyp jatyr.
«Jańarǵan Jańaqorǵan jastary» eriktiler toby 2019 jyly «Jastar jyly» aıasynda Qyzylorda oblysynyń Ádilet departamentinen resmı tirkeýden ótken. Alaıda júregi jomart jandar jumysyn 2016 jyly kómekke zárý jandarǵa azyq-túlik, kıim-keshek taratýdan bastaǵan. Volonterler quramynda aǵa býyn ókilderi de, kásipkerler men san salany ıgergen mamandar da bar. Olardy biriktirgen bir ǵana ıdeıa. Ol – «Memleket maǵan ne beredi?» degen masyldyq psıhologııadan arylyp, «Men elim úshin ne jasaı alamyn?» degen ómirlik ustanym.
– 2018 jyly Aqzıla degen kisige úı salyp berdik. Kúıeýi ómirden ótken, qyzy men onyń múmkindigi shekteýli balasy úsheýi birge palatkada turyp jatqan. Baspanaǵa zárý ekenin áleýmettik jeliden bildik. Bul kisilerdiń óz baspanasyna kirgendegi qýanyshyn kórseńiz! Qurylysty bitirip, úıge kirgenge deıin barlyq otbasy úshin jańalyqty qupııa ustaımyz. Qaıyrymdylyq qorjyny jergilikti kásipkerlerdiń qoldaýymen tolyǵady. Al úıdi eriktiler asar ádisimen salady. Ár baspana teledıdar, jıhaz, kilem, kórpe-tósekpen birge beriledi. Tiginshi qyz-kelinshekter perdesine deıin tigip kómektesedi, – dedi qoǵamdyq birlestik jetekshisi Erkinbek Aınaqojaev.
Búginde aýdan ákimdiginiń qoldaýymen jastar resýrstyq ortalyǵynan arnaıy bólme de berilipti. Olardyń negizgi atqaratyn 4 baǵyty bar: bilim, qaıyrymdylyq, rýhanııat, sport jáne óner. Biraq basymdyqty turmysy tómen otbasy múshelerin jumyspen qamtý, baspana turǵyzý, kásipke baýlý, tegin kıim-keshek úlestirý, azyq-túlikpen qamtamasyz etýge arnaıdy. Sondaı-aq eriktiler balalardyń bos ýaqytyn tıimdi ótkizý úshin 2 balalar oıyn alańqaıyn salǵan.
Qaıyrymdylyq baǵytynda «Qarmaq» jobasyn da iske asyrylyp jatyr. Bul joba shyǵystyń «Qarny ashqan adamǵa balyq ber me, qarmaq ber» degen naqylynan týyndaǵan. Iаǵnı áleýmettik jaǵynan az qamtylǵan otbasy múshelerin kásipke baýlý maqsatynda master-klasstar ótkizilip, kerekti qural-jabdyqtaryn alyp beredi. Al bilim baǵyty boıynsha jastarǵa arnalǵan túrli semınarlar, ıntellektýaldy oıyndar turaqty ótkiziletin kórinedi. Máselen, byltyr jeltoqsan aıynda mektep oqýshylary arasynda «Intellektýaldy ult» saıysy jáne «Kaıdzen úzdiksiz damýdyń qupııasy» kitabynyń avtory Ǵanı Baıǵalıulynyń jas kásipkerlerge arnalǵan tegin semınar-trenıngin uıymdastyrǵan.
Jomart jandar óńirlerde bolǵan tótenshe jaǵdaılar kezinde de qarap qalmaı, kómek qolyn sozyp, azyq-túlik, kıim-keshek, gıgıenalyq zattar men qarjylaı qoldaý kórsetip, ıgilikti istermen de úzdiksiz aınalysyp keledi.