Isataı aýdandyq poshta torabynyń kýreri Janar Muhanbetova Aqqystaý aýylynda turady. Ol gazet-jýrnaldy elektrli mopedpen taratyp júr. Jańa úlgidegi tehnıkany 200 myń teńgege satyp alǵan.
«Kóligimdi 2-3 saǵat elektrmen qýattandyryp alamyn. Onyń qýaty 45 shaqyrym jol júrýge jetedi. Buryn gazet-jýrnaldy jaıaý taratyp, biraz sharshaıtyn edim. Qazir jumysym jeńildedi. Merzimdi basylymdardy jarty kúnde taratyp shyǵamyn», deıdi Janar Muhanbetova.
Aýdan ákimi Polymbet Hasanov moped mingen poshtashymen tanysýǵa bel býypty. О́ıtkeni onyń jumysy qyzyqtyrǵan.
– Kún saıyn jumysqa aýdandyq poshta torabynyń aldynda turǵan eki dóńgelekti mopedti kóremin. Bul tehnıkany kim, qandaı maqsatta paıdalanatynyn bilgim keldi. Kóliktiń ıesi – kýrer qyzmetin atqaryp júrgen Janar Muhanbetova. Mundaı qarapaıym jumysqa qyzyǵýshylyq joq. Qazir aýdanda taǵy eki kýrerdiń orny bos tur, – deıdi Polymbet Hasanov.
Ákimniń aıtýyna qaraǵanda, qarapaıym eńbek adamdaryna qoldaý kórsetilip keledi. Máselen, byltyr poshta salasynda uzaq jyl gazet tasýshy bolǵan Qalampyr Súıeýqyzy «Eren eńbegi úshin» medalimen marapattalǵan. «Ár adamnyń nesibesi óziniń peıiline baılanysty bolady ǵoı. Nıetimiz túzý bolsa, kez kelgen jumystan berekeli tabys tabýǵa múmkindik bar. Sol sebepten, jastardy qyzmettiń bedeline qaramaı, adal eńbek etýge shaqyramyn» deıdi aýdan ákimi.