Aýyldarda mobıldi qoǵamdyq keńistikter uıymdastyrylady. Olar Túrkistan, Atyraý oblystarynyń aýyldarynda, sondaı-aq Almaty qalasynyń mańyndaǵy aýdandarda jumys istemek. Ilkimdi is Aqparat jáne qoǵamdyq damý mınıstrliginiń qoldaýymen «Jastar keńistigi» jobasy iske asyrylyp jatyr.
Is-shara sheńberinde «Áleýmettik jobalar qory» KQ mobıldi qoǵamdyq keńistikterdi qurady ári otbasylyq tanymdyq demalysty uıymdastyryp, dáripteıdi.
– Joba aıasynda biz aýyl jastaryna erekshe kóńil bólemiz. Jastardyń oblys ortalyqtaryna jetýine qıyndyq keltirmeý úshin bizdiń jattyqtyrýshylar óńirlerdi ózderi aralaıtyn bolady. Aýyldarda biz jastardy mobılografııa, SMM, akterlik sheberlik sııaqty suranysqa ıe mamandyqtarǵa, sondaı-aq alǵashqy medısınalyq kómek kórsetý daǵdylaryna oqytamyz. Jalpylaı alǵanda, Túrkistan jáne Atyraý oblystaryna qarasty 10 aýyldyń 200-den astam jas turǵynyn oqytý kýrstarymen qamtýdy josparlap otyrmyz, – dedi joba jetekshisi Erbol Keńgerbaev.
Qysqamerzimdi oqytý kýrstarynan alǵashqy bolyp Atyraý oblysy Qyzylqoǵa aýdanyna qarasty Mııaly aýylynyń jastary ótipti. Al otbasylyq mádenı demalysty nasıhattaý maqsatynda qoǵam belsendileri balalar men jasóspirimderge arnalǵan túrli úıirme uıymdastyryp jatyr.
– Biz eski otbasylyq dástúrlerdi jandandyrǵymyz keledi. Barlyq otbasy múshesin aýlalardy abattandyrý, uıa salý syndy qarapaıym dúnıelerden bastap, aýqymdy is-sharalarǵa qatystyrmaqpyz. Ýaqytty osylaısha birlese ótkizý otbasy ınstıtýtyn damytýǵa ońtaıly áser etedi. Bir jaǵynan januıadaǵy ár adamnyń ekologııalyq saýattaryn ashýǵa úles qosamyz. Bul otbasylyq mádenı demalystyń damýyna yqpal etedi dep senemiz. Sondaı-aq biz «Mýzeı túni», kıno keshteri sııaqty is-sharalardy ótkizemiz. Qatysýshylarda synı oılaýdy jetildirý maqsatynda pikirsaıys úıirmelerin, qarjylyq saýattylyqty arttyrý jáne «Jastarǵa bıznes» áleýmettik beıimdelý jónindegi is-sharalardy ótkizemiz. Jalpy aıta ketsem, «Jastar keńistigi» jobasy 2024 jyldyń sońynda aıaqtalady, – dedi joba jetekshisi.