Bıyl Atyraýda alǵash ret áskerı baǵyttaǵy «Sarmat» mamandandyrylǵan mektep-lıseı-ınternaty ashyldy, dep habarlaıdy Egemen.kz.
Keleshekte mamandyǵyn áskerı qyzmetpen baılanystyrǵysy keletin balalarǵa áskerı baǵyttaǵy «Sarmat» mamandandyrylǵan mektep-lıseı-ınternaty zor múmkindik ashady.
«Mektep-lıseıge qabyldaý boıynsha konkýrstyq irikteý 1-2 shilde kúnderi aıaqtaldy. 500-ge jýyq atyraýlyq oqýshy eki kezeńnen turatyn emtıhannyń birinshi kúni qazaq tili men matematıkadan testileýge qatysyp, ekinshi kúni deneshynyqtyrý qabiletterin baǵalaý boıynsha synǵa tústi», dedi mektep dırektory Erlan Daırabaıuly.
2023-2024 oqý jylynda 7-8-9-synypqa barlyǵy 120 oqýshy qabyldanatyny belgili bolyp otyr. Ár synypta 20 baladan bilim alady, ıaǵnı, eki 7-synyp, eki 8-synyp jáne eki 9-synyp bolady.
«2025 jylǵa qaraı mekteptegi bala sanyn 300-ge deıin jetkizý josparlanyp otyr. Ata-analardyń, oqýshylardyń jedel aqparat alýy úshin sarmat.edu.kz resmı saıtyn jáne Facebook pen Instagram áleýmettik jelilerinde arnaıy paraqshalarymyzdy iske qostyq», dep naqtylady Erlan Daırabaıuly.
Atyraý qalasyna qarasty Jańatalap okrýgindegi 300 orynǵa eseptelgen atalmysh mekteptiń oblys aýdandarynan kelgen balalarǵa arnalǵan jataqhanasy da bar.
Oqýshylarǵa 6 mezgil tamaqtaný, tósek orny, áskerı kıim úlgileri, oqý-quraldary, sporttyq jabdyqtar tegin qarastyrylǵan. Áskerı baǵyttaǵy mundaı mektep ázirge elimizdiń sanaýly ǵana aımaqtarynda bar.