Strategııalyq josparlaý jáne reformalar agenttigi Ulttyq statıstıka bıýrosynyń deregi boıynsha, 2023 jyldyń alǵashqy 4 aıynda (qańtar-sáýir) elimizge 3,5 mln týrıst kelgen. Bul – ótken jyldyń sáıkes kezeńimen salystyrǵanda 36%-ǵa artyq. Mádenıet jáne sport mınıstrligi osy ýaqyt aralyǵynda ishki týrızmdi yntalandyrýǵa arnalǵan birneshe baǵdarlama ázirlep, iske qosty. Sonyń nátıjesi bolar, keıingi jyldary elimizge keletin saıahatshylardyń sany kúrt artyp otyr.
Osy rette, elimizge kelgen 3,5 mln týrıstiń nazaryn ózderine aýdaryp, qyzyǵýshylyǵyn týdyrǵan Qazaqstannyń úzdik bes qalasyn nazarlaryńyzǵa usynamyz. Ázirge, elge keletin týrısterdiń basym bóligi Alataýdyń bókterinde ornalasqan Almatyǵa soqpaı ketpeıtini baıqalady. Iаǵnı Almatynyń taý-shańǵy kýrorttary, sulý tabıǵaty, qolaıly klımaty men qonaqjaılylyǵy týrısterdi beıjaı qaldyrmasa kerek. Osy jáne basqa da artyqshylyqtary bar Almaty qazirgi tańda elimizdegi biregeı týrıstik qala sanalady. Bıylǵy jyldyń alǵashqy tórt aıynda ońtústiktegi megapolıske 1 185 130 adam saıahattap kelgen eken.
Elimizge keletin týrısterdiń ekinshi baǵyty – Astana qalasy. Elimizdiń bas shahary ákimshilik-iskerlik ortalyq qana emes, týrıster jıi tańdaıtyn basym baǵyttardyń birine aınalyp úlgerdi. 2023 jyldyń alǵashqy tórt aıynda ǵana Astana 951 750 meımandy qabyldaǵan. Búginde Mádenıet jáne sport mınıstrliginiń qoldaýymen elorda irgesinde elimizdegi eń úlken ashyq aspan astyndaǵy mýzeı qurylysy júrip jatyr. Bozoq – bas qalanyń týrıstik boıtumary retinde qonaqtar mindetti túrde tamashalaýǵa baratyn orynǵa aınalady.
Qonaqjaılylyq boıynsha eshkimge ese jibermeıtin Shymkent týrıster sany jaǵynan da kósh basynda. Qańtar-sáýir aralyǵynda shyraıly Shym shaharǵa 346 280 adam saıahattap barǵan. Munda kez kelgen týrıst kóńili qalaǵan demalysty tańdaı alady. Kıeli tarıhı oryndarǵa saıahat, shıpaıjaıdaǵy demalys nemese qalada jıi uıymdastyrylatyn sporttyq, mádenı-buqaralyq is-sharalarǵa qatysýǵa bolady.
Atyraý qalasy da sheteldik týrıster arasynda tanymal qalaǵa aınalyp barady. 2023 jyldyń alǵashqy tórt aıynda qalaǵa 305 460 qonaq kelgen. Mamyr aıynda Mádenıet jáne sport mınıstrliginiń qoldaýymen óńirde «Saraıshyq» vızıt-ortalyǵy ashyldy. Munda týrısterge Qazaq handyǵy, Altyn Orda jáne ejelgi dáýirdegi qalashyq tarıhymen tanysýǵa barlyq jaǵdaı jasalǵan. Demek jazǵy maýsymda Atyraýǵa kelýshiler sany taǵy da artatyny anyq.
Sonymen qatar qart Kaspııdiń aqmarjany – Aqtaý da týrısterge tartymdy qala sanalady. Bıyl qańtar-sáýir aralyǵynda Aqtaýǵa 220 660 qonaq kelgen. Al jazǵy maýsymda týrıster tarapynan Mańǵystaý oblysynyń ortalyǵyna qyzyǵýshylyq 20%-ǵa deıin artyp otyr.