Balet ártisi, «Astana Opera» teatrynyń jetekshi solısi Baqtııar Adamjan qazir aýqymdy eýropalyq týr aıasynda Italııa tórinde óner kórsetip júr. Uıymdastyrýshylar avtorlyq baǵdarlamada qazaq ártisin aıryqsha darynyn nazarǵa alyp, odan balettik repertýardan tehnıkalyq turǵyda kúrdeli nómirlerdi bılep berýin surapty.
Qazaq bıshisi «Roberto Bolle jáne dostary» atty balet keshterinde jahan jurtshylyǵyn harızmasymen jáne kásibı sheberligimen tańǵaldyrdy. Aıta keteıik, atalǵan balet keshteri 11-29 shilde aralyǵynda Rım, Florensııa, Verona, Kazerta qalalarynda ótip jatyr. Al 27, 29 shildede elordalyq teatrdyń jetekshi solısin Genýıa men Taormınadaǵy spektaklder kútedi.
– Bul týrǵa meni dosym, esimi álemge tanymal, ańyzǵa aınalǵan balet ártisi Roberto Bolle shaqyrdy. Onyń óziniń «Artedanza» prodıýserlik ortalyǵy bar, olarmen kóp jyldan beri shyǵarmashylyq baılanystamyz. Solardyń shaqyrýymen Italııaǵa jylyna 4-5 ret baryp turamyn. Endi osy joly kórermenniń suraýy boıynsha jazǵy týrǵa shaqyrdy. Roberto Bolleniń konsertterine qatysý – óz sheberligińdi úlken aýdıtorııanyń aldynda pash etýge jaqsy múmkindik. Álemge áıgili bir ǵana Arena dı Verona kóne amfıteatrynyń ózinde ónerimdi 15 myńnan astam kórermen tamashalady. Sondyqtan men úshin bul gastrol tek qana óz shyǵarmashylyǵymdy ǵana emes, jalpy qazaq balet ónerin tanystyrýǵa keremet alań ekeni anyq. Bir baıqaǵanym, mundaǵy kórermen unatqan ártisteri týraly barlyq málimetti muqııat zertteıdi eken: qaı jerden ekenderin, qaıda jumys isteıtinderin bilgileri keledi. Meniń ıtalııalyq jankúıerlerim áleýmettik jelilerdegi paraqshalaryma jazylyp, sonda ózderiniń jyly lebizderin qaldyryp jatyr. Osynaý tamasha elde shyǵarmashylyǵymdy baǵalap, konsertterime 4 jyldan beri kelip júrgen jandar bar. Sonymen qatar ónerimdi búkil Eýropa, Aýstralııa, Ońtústik Amerıka, Japonııa jáne basqa da elderdegi asqaq óner jankúıerleri baqylap otyrady, – deıdi Baqtııar Adamjan.
Roberto Bolle óziniń gala-keshterine tek joǵary deńgeıdegi oryndaýshylardy shaqyratynyn atap ótýimiz qajet. Osy rette «Astana Opera» premeri Baqtııar Adamjannyń Roberto Bolleniń konsertterine jyl saıyn qatysyp kele jatqany jetekshi solıstiń álemdik balet ónerinde laıyqty oryn alǵanyn taǵy bir dáleldeı túsedi.
11-13 shilde aralyǵynda Rımdegi Karakalla termalarynda ótken mýzykalyq festıvalde bıshi L.Mınkýstyń «Don Kıhot» jáne A.Adannyń «Korsar» baletterinen pa-de-deni oryndady. Araǵa eki kún salyp, Florensııadaǵy áıgili «Piazza della Santissima Annunziata» alańynda Senkıngtiń mýzykasyna horeograf Isıan Chjannyń «In the wake» zamanaýı nómiri men «Don Kıhot» baletinen pa-de-deni usyndy. Onyń 19 shildede Arena dı Verona amfıteatryndaǵy, 22 shildede Redjıa dı Kazertadaǵy óner kórsetýleri de jaqsy ásermen ótti.
Aıta keteıik, Italııadaǵy gastrol osy aıdyń sońyna deıin jalǵasady. 27 shildede otandasymyzdyń qatysýymen Genýıadaǵy Vılla Grımaldı alańynda, 29 shildede Taormınadaǵy kóne teatrda Balet keshteri ótedi. Baqtııar onda joǵaryda atalǵan nómirlermen qatar Sezar Pýnıdiń «Esmeralda» baletinen «Dıana jáne Akteon» pa-de-desin usynady.
– Keıde shetelde konsertter men spektaklderge qatysý týraly usynystardan bas tartýǵa týra keletin kezder bolady. Sebebi «Astana Operada» meni taǵatsyzdana kútetin súıikti kórermenimniń aldynda óner kórsetkim keledi. Bul men úshin zor qýanysh ári jaýapkershilik. Osy rette qyzmetime únemi qoldaý bildirip júrgen teatr basshylyǵyna, ásirese balet trýppasynyń kórkemdik jetekshisi Altynaı Asylmuratovaǵa alǵysymdy aıtqym keledi, – dedi bıshi.
«Astana Operanyń» jetekshi solısi elimizde ǵana emes, álemdik balet ónerinde tanymal ekeni barshaǵa aıan. Onyń óner kórsetýler kestesi aldaǵy birneshe aıǵa jazylyp qoıady. Máselen, solıst tamyzda Ballet International Gala uıymdastyrýshylarynyń shaqyrýymen osymen tórtinshi márte Aýstralııaǵa attanbaqshy. Onda Baqtııar sahnadaǵy juby Shuǵyla Ádephanmen birge óner kórsetedi. Al kúzde balet juldyzy Ońtústik Koreıa astanasy Seýlde Star Gala-da, AQSh-tyń San-Fransısko qalasynda «Petipa Awards» marapatyn tabystaý rásiminde, sonymen qatar Kıpr men Shveısarııa sekildi basqa da elderde sahnaǵa shyǵady.