Ekibastuzdyń jylý-elektr stansasyndaǵy kúrdeli jóndeý jumystary oblys basshylyǵynyń ǵana emes, úkimettegilerdiń de qatań qadaǵalaýynda turǵany málim. Ortalyqtaǵy jabdyqtardy jamap-jasqaý sharalaryna 250 adam jumyldyrylǵan. Búginde olar alǵashqy kezeńge josparlanǵan jóndeý jumystarynyń shamamen 40 paıyzdaıyn eńserdi.
Ekibastuz JEO-daǵy bes birdeı sý jylytqysh qazandyqtaryn jóndeýge 200-den asa adam tartylǵan. №11, 14 jáne 15 qazandyqtardy 20 qyrkúıekke deıin qalpyna keltirý kózdelip otyr. О́zge №12 jáne 13 qazandyqtaryn jóndeý merzimi uzaǵyraq, 31 qazanǵa deıin jalǵasady. Merdiger «SAEM-Pavlodar» JShS-niń bas dırektory Tımýr Kalendarevtiń aıtýynsha, atalǵan úsh qazandyq boıynsha tekshe ydystar men panelderdi montajdaý júrip jatyr.
– Alǵashqy úsh qazandyqtaǵy jóndeý jumystarynyń 40 paıyzdan astamy oryndaldy. Jóndeý bastalatyn taǵy eki qazandyqty jýyp, jabdyqtaryn buzý sharalary bastalyp ketti. Qondyrǵylarda qalatyn eski qubyrlar tolyqtaı tekserildi. Ruqsat shegindegi normalar men parametrlerge sáıkes kelse, burynǵy qubyrlar men qosymsha jabdyqtardy ornynda qaldyramyz, ózgesin jańasyna aýystyramyz. Jańa qubyrlardy artyǵymen aldyrǵanbyz, sondyqtan barlyǵyna jetkilikti bolady. Osy aptada stansaǵa eki jelilik sorǵy keledi, odan soń tamyz aıynda taǵy bireýi kútilýde, deıdi ol.
Stansadaǵy jelilik qubyrlar da jańartylady. Bul jumystarǵa shamamen 30 adam jaýapty. Odan soń ortalyqqa ekrandy qubyrlar jetkiziledi. Materıal kesteden keshikpeı jetkizilse, tamyz sońyna deıin olardy tolyq dánekerlep shyǵý kózdelip otyr.
«Sý jylytqysh qazandyqtar boıynsha másele joq. Tamyz aıynan gıdravlıkalyq synaýlardy bastap ketemiz. Merdiger kompanııalardyń basshylarymen sóılese kele jóndeý sharalaryn odan ári kúsheıtý jóninde kelistik. Iаǵnı jumys kúshi aldaǵy ýaqytta taǵy da kóbeıedi. Jylytý júıesiniń joǵary qabatyndaǵy jumystar aıaqtalyp qalǵany sebepti barlyq toraptardy qamtýymyz kerek. Aldaǵy aptanyń sońyna deıin №11 qazandyqtaǵy konvektıvti paketterdi montajdaýdy aıaqtaý mindeti tur», dep qosty T.Kalendarev.
Gıdravlıkalyq synaýlar 30 shildege deıin jalǵasatyny sebepti Ekibastuz qalasynyń barlyq úıleri osy aptada ystyq sýdan ýaqytsha ajyratylady. Bul ýaqytta shahardyń magıstraldik jáne oramishilik jylý jelilerinde qubyrlardyń tyǵyzdyǵy men tózimdiligi tekserilip, paıda bolǵan jaryqtar jamalady. Merdigerler barlyq josparly sharalar ýaqytymen atqarylyp, qala jurtshylyǵyna jylý kesteden keshikpeı beriledi dep sendirip otyr.