Qazir mektepte oryn tapshylyǵy, apatty nysandar jıi kóterilip júr. «Jaıly mektep» ulttyq jobasyna sáıkes Almaty qalasynda 2025 jylǵa qaraı 37 myń oqýshyǵa arnalǵan 22 mektep salý josparlanyp otyr.
Almaty qalasy ákimdigi jobalyq keńsesiniń málimetinshe, qurylys mektepke zárý eldi mekenderde júrgiziledi. Qazirgi ýaqytta jobalyq-smetalyq qujattardy ázirleý jumystary bastaldy. Mektepterdiń qurylysy bıyl qarasha aıynda saraptamadan ótkennen keıin qolǵa alynbaq. Qala ákimdigi men birqatar aýdandaǵy jer telimderiniń ıeleri segiz mekteptiń qurylysy týraly memorandýmǵa qol qoıý jumystaryn iske asyryp jatyr. Jańa formattaǵy mektepter boıynsha Alataý, Naýryzbaı aýdandarynda – 5 mektepten, Bostandyq aýdanynda – 4, Túrksib aýdanynda – 3, Áýezov aýdanynda – 2, al qalǵan aýdandarda bir-birden salý josparlanyp otyr.
Jýyrda Almaty qalasynyń ákimi Erbolat Dosaev «Almatybasjospar» ǴZI» JShS, «Samruk-Kazyna Construction» AQ jáne ózge de jaýapty oryndar ókilderdiń qatysýymen ótken jıynda mektepterdiń qurylysyn sapaly júrgizý jáne ýaqytyly paıdalanýǵa berý jónindegi basqarmalardyń jumysyn jedeldetýdi tapsyrǵan bolatyn.
Ákimdik qalany bilim berý mekemelerimen qamtamasyz etýdiń memlekettik tapsyrys, jer telimi ıeleri salǵan mektepti daıyn bolǵanda satyp alý jáne memlekettik-jekemenshik áriptestik aıasyndaǵy qurylysy sııaqty 3 tetigin paıdalanbaq. Jobany iske asyrýǵa jaýapty «Samruk-Kazyna Construction» AQ balansyndaǵy 10 jer ýchaskesin qala ákimdigi tapsyrysty oryndaýshyǵa berdi. Eki ýchaske qoldanystaǵy eski mektep ǵımarattaryn (№97 jáne №154 lıseı) buzǵannan keıin paıdalanylady. Qazirgi kezde Rozybakıev-Levıtan kósheleriniń qıylysyndaǵy taǵy bir ýchaskeni satyp alý quny boıynsha menshik ıesimen kelissózder júrgizilip jatyr.
Josparǵa sáıkes jaıly mektepterde erekshe bilim berý qajettilikteri bar balalarǵa qolaıly jaǵdaı jasaý kózdelip otyr. Sonymen qatar joǵary jyldamdyqty ınternetpen qamtamasyz etilip, bastaýysh synyp oqýshylary men joǵary synyp oqýshylarynyń mektepke kirip-shyǵýyna bólek kireberister qarastyrylǵan. Lıft, elektrondy kitaphanalar jáne hokkeı korty, jeke buıymdaryn qoıýǵa arnalǵan shkaftar da oqýshylardyń qolaıly bilim alýyna laıyqtalyp jasalady. Paıdaly demalys uıymdastyrý úshin ár qabatta kovorkıng alańdar, Face ID jáne QR-kodtar qoıylyp, avtomatty túrde qulyptalatyn jáne ákimshilik mektep ǵımaraty men aýlasyndaǵy jaǵdaıdy naqty rejimde qadaǵalap otyrýy úshin beınebaqylaý júıeleri de ornatylatyny bilim alý mekemelerindegi qaýipsizdikti kúsheıtýge baǵyttalmaq.