Anımasııalyq stýdııalardyń mamandary men T.Júrgenov atyndaǵy Qazaq ulttyq óner akademııasynyń jáne Qazaq ulttyq óner ýnıversıtetiniń stýdentteri Túrkııanyń Ankara qalasynda sheberlikterin shyńdap, tájirıbe jınaqtap júr. Joba aıasynda Qazaqstan rejısserleri, prodıýserler men sýretshi-anımatorlary jergilikti áriptesterimen tájirıbe almasyp, praktıkalyq jumystardy birlese oryndaıdy. Birneshe kúnge josparlanǵan oqý aıasynda Túrkııanyń tanymal mamandarynyń qatysýymen sheberlik sabaqtary da ótedi.
Eske salsaq, qazaqstandyq stýdııalar Mádenıet jáne sport mınıstrliginiń qoldaýymen túrkitildes elderge ortaq ejelgi ańyzdar jelisimen 10 pılottyq anımasııalyq jobanyń óndirisin bastady. Anımasııalyq almanahqa kiretin ár týyndynyń hronometrajy 5 mınýttan asady. Bul joba túrkitildes memleketter arasyndaǵy yntymaqtastyqty nyǵaıtyp qana qoımaı, bolashaqta baýyrlas eldermen birlesken anımasııalyq jobalar jasaýǵa múmkindik beredi.
Qazaqstan anımasııa mamandarynyń ekinshi toby Polshadaǵy Krakow Animation Center ortalyǵynda tájirıbe jınaqtap jatyr. Oqý barysynda jergilikti anımasııalyq stýdııalardyń jumystaryn qarap, balalarǵa qyzyqty taqyryp tańdaý, ssenarıı jazý sheberligi jáne marketıng boıynsha biliktilik arttyrady.
«Anımasııa salasy únemi ózgerip, damyp otyrady. Sol sebepti otandyq mamandardyń biliktiligin arttyrý óte mańyzdy. Bul tájirıbe almasý- men qatar sheteldik stýdııalarmen yntymaqtastyq ornatý arqyly jańa naryqtarǵa shyǵyp, kórermender aýdıtorııasyn ulǵaıtýdyń jaqsy múmkindigi. Aldaǵy ýaqytta álemdegi eń tanymal stýdııalardyń mamandaryn tájirıbe almasý úshin elimizge shaqyrýdy da josparlap otyrmyz», dedi Mádenıet jáne sport vıse-mınıstri Arman Júdebaev.