Atyraý oblysyna jumys sapary barysynda Ulttyq ekonomıka mınıstri Álibek Qýantyrov «Aýyl – El besigi» baǵdarlamasy boıynsha salynyp jatqan 200 oryndyq Mádenıet úıiniń qurylysymen tanysty. Jobanyń quny 725 mln teńgeni quraıdy. Nysandy osy jyldyń sońyna deıin tapsyrý josparlanýda, dep habarlaıdy Egemen.kz atalǵan mınıstrliktiń resmı saıtyna silteme jasap.
UEM basshysy mádenı nysan aýmaǵynda aýyldyq okrýg turǵyndarymen kezdesip, ótinishterin tyńdady.
Jergilikti halyqtyń aıtýynsha, Turǵyzba aýylynan Jem ózeninen ótetin kópir salyp, ózenniń túbin tazartý qajet.
Sonymen qatar aýylishilik joldardy salý, kóshelerdi jaryqtandyrý jumystaryn júrgizý qajettiligi týraly aıtyldy.
Turǵyndar aýylda kórsetiletin medısınalyq qyzmettiń sapasyn arttyrý jáne aýyl sharýashylyǵyn damytý máselesin kóterdi.
Mınıstrdiń aıtýynsha, Qazaqstan aýyldarynda ómir súrý deńgeıi Aýyldyq aýmaqtardy damytý tujyrymdamasy, «Aýyl - El besigi» baǵdarlamasy jáne «Aýyl amanaty» jobasy sheńberinde jaqsaratyn bolady. Barlyq tirek aýyldyq eldi mekender aldaǵy jyldary mınımaldy turǵyn standarttaryna jetkiziletin bolady.