Ýaqyttyń aǵymyna qaraı án de, ánshilerdiń talǵamyna saı sán de ózgerdi. Janǵa jaıly janrlar da aıtarlyqtaı «tóńkeristi» bastan keship jatqan jaıy bar. Endi she, tehnıka ózgerdi, tehnologııanyń úzdiksiz damyǵan ýaqytynda ol endi bir zańdylyqqa aınalǵandaı kórinetini ras.
Qazir kez kelgen adamnyń jedel tanylýǵa múmkindigi mol. Ánshiler de áleýmettik jeliniń arqasynda halyqtyń qoshemetine ıe bop jatqany daýsyz. Sondaıda «shóp te óleń, shóńge de óleń» bolmasa eken deısiń. О́ıtkeni keıde erkindik te adamdy essizdikke aparady emes pe?
Bir anyǵy, búginde talǵamyna daq túsirmegen jas ánshiler shoǵyry qalyptasyp kele jatqany qýantady. Solardyń biri – «Iа lıýblıý tebıa, Álııa» ánimen tanylǵan jas peri Sadraddın Bolatuly. Júrekke jyly tıetin ánderimen tyńdarmannyń qoshemetine bólengen ánshiniń shyǵarmalary búginde jastar arasynda zor tanymaldyqqa ıe ekeni daýsyz.
«Mýzyka – adamzat ataýlynyń ámbebap tili» degen Genrı Longfellonyń sóziniń jany bar. Aıtalyq, birneshe hıt ánimen ánsúıer qaýymnyń kózaıymyna aınalǵan Sadraddınniń «Ant» degen shyǵarmasy shynynda da jas talanttyń tólqujatyna aınalǵanyna eshkimniń talasy joq shyǵar.
«Júregimmen ant berdim,
Shúkir, Alla baq berdi.
Bolashaqtyń dápterin,
Jazyp kelem bas áriptermen», dep bastalatyn ánniń alǵashqy shýmaǵynan-aq týyndynyń ón boıynan dıdaktıkalyq oıdyń órile túsetinin ańǵarý qıynǵa soqpaıdy. Soǵan qarap bul ánniń tyńdarmany kóp bola qoımas dep paıymdaıtynyńyz daýsyz. О́ıtkeni túpki oıy dıdaktıkalyq pálsapamen astasyp jatatyn shyǵarmalardyń «ǵumyry» bul kúnde uzaq emesteı kórinetini aqıqat. Biraq jas ánshiniń talanty men sheberligi biz oılaǵan, qalyptasqan barlyq qasań qaǵıdanyń tas-talqanyn shyǵaryp tastapty.
Iá, joǵaryda Longfellonyń sózin beker aıtpadyq. Sadraddınniń «Ant» degen osy bir áni Youtube-te 24 mıllıon qaralym jınapty. Endi sol mıllıondardyń qanshasy sheteldik ónersúıer qaýym ekenin ózińiz paıymdaı berińiz.
«Eńseńdi kóter, baýyrym,
Jasaǵyn istiń táýirin.
Adamnyń kúni adammen,
Kóp dosyń keıde bolǵanmen,
Is tússe qaıda qalǵanyn?
Betperde kıgen jan-jaǵym
Kimge kimmin bilmeı baramyn», degen shýmaqtar álbette júrekke jyly tıetini daýsyz. Áıtkenmen, kúndelikti aıtylatyn moraldyq áńgimelerdiń óleńdegi jıyntyǵyndaı kórinetini jáne jasyryn emes.
«Sanada myń suraq,
Bir turyp, bir qulap.
Pendeńe myń synaq,
Bir kúlip, bir jylap.
Qalaǵanyńdy sura,
Jaratqanyńnan jylap.
Alaqanyńdy jaıyp,
Aldaǵy kún ýaıym», – dep túıindeletin ádemi ánniń qaıyrmasy qazaqtildi tyńdarmannyń sanasynda birden saqtalatyny talas týdyrmaıdy. Tilge jeńil ekenine kúmán joq.
Qalaı alyp qarasaq ta, ánniń halyqaralyq deńgeıde tanylýyna ánshiniń únindegi qazaqy boıaý men sheberliktiń áser etkeni talassyz. О́ıtkeni ánshiniń án ıirimderine erekshe boıaý qosatyny, izdenistiń izine túsetini esti tyńdarmanǵa birden baıqalady desek, qatelese qoımaspyz. Sonysymen án kópshiliktiń júregine jol tapqany daýsyz.
Jas ánshi bala kúninen kásibı maman bolýdy armandapty. Búginde jastardyń júregin jaýlaǵan talantty azamat armanyna jetkeni daýsyz. Namysyn qaıraǵan qazaq uly tynymsyz eńbek etse, halyqaralyq deńgeıde de qazaq ánin tanytatynyna shúbá joq. «Ant» degen ánimen tanylǵan talanttyń antyna adal bolyp, mýzyka áleminde óshpes iz qaldyratynyna senim mol.