Júrekke ámir júrmeıtini ras qoı. Buǵan mysal kóp. Sonyń biri – qazaq jigiti Sherhan men orys qyzy Iýlıananyń mahabbaty.
Iýlıana Novıkova Jylyoı aýdanynyń ortalyǵy – Qulsary qalasynda dúnıege kelgen. Osyndaǵy orta mektepti bitirgen. Budan 12 jyl buryn shańyraq kótergen juptyń dostyǵy mektepte bastalǵan. Keıin bir-birine ómirlik serik bolýǵa ýádelesken. Qazir olar eki bala tárbıelep otyr. Qazaqtyń tabaldyryǵynan ımenbeı attaǵan orys qyzy halqymyzdyń ulttyq salt-dástúriniń bárin saqtaıdy.
– Biz ata-enemizben birge turamyz. Olar – qonaq kútkendi jaqsy kóretin adamdar. Ata-eneme kún saıyn sálem salamyn. Sálem salý – úlkenge qurmettiń belgisi. Úlkenniń «Baqytty bol, aınalaıyn!», «Qosaǵyńmen qosa aǵar!» degen batalary qabyl bolaryna senemin. Ár batanyń astarynda jastarǵa, otbasyǵa jaqsylyq tileý bar ǵoı. Teginde úlkennen bata alý artyq etpeıdi. О́ıtkeni otbasyndaǵy berekeni arttyratyn dástúrdiń biri – bata. Sol sebepten úlkenderden bata alýǵa tyrysamyz. Ásirese Naýryz meıramy, kórisý kúnindegi batanyń jóni bólek, – deıdi Iý.Novıkova.
Onyń aıtýynsha, otbasynda barlyq merekede dastarqan jaıylyp, qonaq kútedi. О́zi jeti túrli dámnen Naýryz kóje daıyndaǵandy, qazy aınaldyrǵandy, baýyrsaq pisirip, et asýdy unatady. Munyń bárin enesinen úırenip alǵan.
Ol qazaq balalarymen birge oınaǵan kezin umytpaıdy. Qazaqshany sol kezden beri biledi. Tek qazaqsha sóıleýdi meńgerip qoımaı, ulttyq salt-dástúrge qanyq bolyp ósken. Onyń anasy men aǵasy da, ápkeleri de qazaqsha sóıleıdi.
– Qazaq aqyndarynyń óleńderin mánerlep oqyǵandy unatamyn. Dala danyshpany Abaıdyń ár óleńi men qara sózinen taǵylym alýǵa bolady. Qadyr Myrza Áliniń «Ana tiliń – aryń bul, Uıatyń bop tur bette. О́zge tildiń bárin bil, О́z tilińdi qurmette!» degenindeı, qazaq tilin jetik bilemin. Men – Qazaqstanda týyp-óstim, osy eldiń azamatymyn. Sol sebepten, ózim turyp jatqan eldiń memlekettik tilin, tarıhy men mádenıetin, salt-dástúrin erekshe qurmetteımin, – deıdi qazaqtyń kelini.
Qazir ol balabaqshada tárbıeshi bolyp jumys isteıdi. Balalarǵa mektepke deıingi tárbıe berýmen birge túrli saıysqa jıi qatysady. Ár saıystan júldesiz qalǵan emes. О́zge etnos ókilderi arasynda ótken «Til – parasat» oblystyq baıqaýynyń jeńimpazy atanǵan. Sondaı-aq «Asyl ana» forýmynda birinshi orynǵa ıe bolǵan.