О́zge etnos ókilderi qazaqsha sóılese, júregiń jylyp-aq qalady. Al dombyramen Qurmanǵazynyń kúıin bebeýletip otyrsa she?
Jylyoı aýdanynyń ortalyǵy – Qulsary qalasynda turatyn Andrıan Romanovty qazaqtyń «sary» balasy deýge bolady. Ol qazaqsha erkin sóıleıdi. Osyndaǵy Qulsary balalar óner mektebiniń dombyra klasyn bitirgen. Qazir onyń inisi fortepıano klasynda oqyp júr.
Andrıan Romanov byltyr «Myń bala» jobasy aıasynda «О́nerli órge júzer» baıqaýyna qatysty. Baıqaýdyń maqsaty ózge etnostar balalarynyń qazaqtyń ulttyq ónerin meńgerýge qyzyǵýshylyǵyn oıatý edi.
– Meniń tańdaǵan mýzykalyq aspabym – dombyra. Kishkentaı kezimnen dombyranyń kúmbirlegen únin unatýshy edim. Qos ishekti aspapty tartýdy ustazym Talant Balǵynbaev úıretti. «Myń bala» jobasynyń baıqaýynda qazaqtyń ónerine mol mura qaldyrǵan qaıtalanbas kompozıtor Qurmanǵazy Saǵyrbaıulynyń «Adaı» kúıin oryndadym. Bul shyǵarmany nege tańdadym? О́ıtkeni bul – adamnyń kóńil-kúıin sharyqtatatyn, jigerlendiretin kúı. Osy kúıdi oryndap, baıqaýdyń jeńimpazy atandym. Astanada Aqparat jáne qoǵamdyq damý mınıstri Darhan Qydyráliniń qolynan marapat alǵan sátte qýanyshymda shek bolmady. Dombyrany meńgerýime, respýblıkalyq baıqaýdyń jeńimpazy atanýyma ustazymnyń eńbegi zor, – deıdi Andrıan Romanov.
Jas dombyrashynyń aıtýyna qaraǵanda, Jylyoı aýdanynda qazaqpen birge birneshe etnostyń ókilderi de turady. Qazaqpen birge el berekesin arttyryp júrgen orys pen tatar, ózbek pen qaraqalpaq sekildi ult ókilderi arasynda halqymyzdyń ónerin dáripteıtinder, ásirese dombyra shertýdi meńgergender az emes. Solardyń qatarynda jas ulan bolashaǵyn qazaq ónerimen baılanystyrýdy kózdep otyr. Andrıannyń armany – Aqtaýdaǵy Mańǵystaý óner kolledjinde mýzykalyq bilim alý. Sóıtip, qazaqtyń kúı ónerin nasıhattaýǵa, damytýǵa úles qospaq.