Kún saıyn Elorda kóshelerinde qoǵamdyq tártipti qamtamasyz etý úshin Ulttyq ulannyń áskerı bóliminiń qyzmetkerleri men 2500-den astam polısııa qyzmetkeri tynymsyz qyzmet etedi, dep habarlaıdy Egemen.kz.
Qazaqstan Prezıdenti Qasym-Jomart Toqaev eldegi, onyń ishinde Astanadaǵy turaqtylyq pen qoǵamdyq tártipti qamtamasyz etýge erekshe nazar aýdarady.
Memleket basshysynyń tapsyrmasy boıynsha osy jyldyń 1 qańtarynan bastap vandalızm aktileri, qoǵamdyq jáne jeke múlikti búldirgeni úshin jaza qatańdatyldy. Prezıdent 3 qańtarda Qazaqstan Respýblıkasynyń Ákimshilik quqyq buzýshylyq týraly kodeksine tıisti túzetýlerge qol qoıdy. Máselen, zalal 200 AEK-ten (690 myń teńge) aspaıtyn bóten múlikti qasaqana búldirgeni úshin ákimshilik jaýapkershilik (QR ÁQBtK 147-1-baby) engizildi.
Astana qalasy ákimdiginiń resmı saıty málim etkendeı, joǵaryda atalǵan bap boıynsha osy jyldyń basynan beri 29 quqyq buzýshylyq anyqtalǵan. Máselen, mamyr aıynda Sh.Qosshyǵululy kóshesindegi №10 úıdiń janynda qala turǵyny bóten múlikti qasaqana búldirip, shlagbaýmdy maıystyryp ketken. Sot ony ákimshilik jaýapkershilikke tartyp, 20 AEK aıyppul salǵan.
«Nóldik tózimdilik» qaǵıdatyn iske asyrý aıasynda bıyl Astanada alty aı ishinde QR ÁQBtK-niń 434-baby «Usaq buzaqylyq» boıynsha 555 hattama toltyrylǵan.
Elorda ákimdigi men polısııa azamattardy qoǵamdyq tártipti saqtaýǵa jáne qala múlkine zııan keltirmeýge shaqyrady.
Aıta ketelik, keshe elordanyń volonterleri qalanyń kórikti oryndarynyń biri – «Atyraý kópirin» túrli graffıtılerden tazartty.