Jastar arasyndaǵy jumyssyzdyq pen eńbek jaǵdaıyn jaqsartý máselelerin sheshýge Kásipodaqtar federasııasynyń janynan ashylǵan «Keleshek» jastar keńesi de aralasyp júr. Osy maqsatta mekeme Aqparat jáne qoǵamdyq damý mınıstrliginiń Jastar jáne otbasy isteri komıtetimen memorandýmǵa qol qoıdy. Quramyna 400 myńnan astam adam kiretin keńes jas jumyskerlerdiń quqyǵyn qorǵap, usynystaryn qabyldaıdy.
«Keleshek» jastar keńesi – kásipodaq birlestiginiń quramyndaǵy jastar saıasatyn úılestirýshi uıym. Oǵan eńbekshi jastardyń áleýmettik, eńbek qatynastaryndaǵy quqyqtary men múddelerin zań aıasynda qorǵaý, jastardyń kúndelikti turmystaǵy ózekti máselelerin sheshý, jastardyń start-ap jobalaryn iske asyrý, sonymen qatar olardy kásipodaq quramyna tartý, t.b. mindetter júktelgen.
– Bizdiń eń basty maqsatymyz jumysshy jastarǵa qolaıly jaǵdaı jasaý. Áleýmettik eńbek salasynda problemalar bar, sonyń ishinde jalaqynyń ósýi, eń tómengi jalaqyny kóterý, qaýipti jáne qıyn eńbek jaǵdaılarynda jumys isteıtin adamdar úshin zeınetkerlik jasty tómendetý jáne basqalary. Bul máselelerdi sheshýdiń mysaldary federasııanyń 2025 jylǵa deıingi strategııasynda kórsetilgen jáne biz úshin jastardyń belsendi qatysýy alǵa qoıylǵan maqsattar úshin mańyzdy. Progress eski máselelerdi sheshýde jańa tásilder paıda bolǵan kezde múmkin bolady. Iаǵnı jastardyń quqyǵyn qorǵaý, múddesin qorǵaý. Qandaı da bir usynystary bolsa, qandaı da bir joba uıymdastyrǵysy kelse, biz osy memorandýmnyń aıasynda olarǵa kómek kórsete alamyz, – dedi Kásipodaqtar federasııasy janyndaǵy «Keleshek» jastar keńesiniń tóraǵasy Aıan Sálimgereev.
Búginde taraptar eńbek qundylyqtaryn nasıhattap, jastardyń ózin ózi jumyspen qamtýyna jaǵdaı jasamaq. Aqparat jáne qoǵamdyq damý mınıstrligi jastar jáne otbasy isteri komıteti tóraǵasynyń orynbasary Rollan Quspannyń aıtýynsha, qazir 35 jasqa deıingi azamattarǵa vedomstvo tarapynan júıeli qoldaý jasalady.
– Qazir elimizde 15-ke jýyq respýblıkalyq jastar uıymy jumys istep tur. Olarǵa biz ózimizdiń tarapymyzdan qoldaý kórsetip otyramyz. Búginde azamattyq bastamalardy qoldaý ortalyǵy arqyly osy uıymdardy qarjylandyrý, granttar bólý jumystary úılestiriledi, – dedi ol.
Bıyl Kásipodaqtar federasııasynyń jastar keńesiniń aldynda tek ulttyq emes, halyqaralyq deńgeıdegi mindetter tur. «Keleshek» uıymy elimizdiń atynan Ortalyq Azııa elderiniń kásipodaqtary janynan Jastar keńesin quryp, tóraǵalyq etpek.