Elimizde qolǵa alynyp jatqan jalpyǵa ortaq deklarasııalaý aıasynda sheneýnikter men kásipkerlerdiń atyndaǵy múlikti rásimdeý derekteri de tekserilmek. Bul týraly Qarjy mınıstri Erulan Jamaýbaev jýrnalısterdiń saýalyna jaýap berý kezinde aıtty.
«Bizde jalpyǵa ortaq deklarasııalaý birneshe kezeńde júzege asady. Ol 2025 jyly tolyq aıaqtalady. Biz sol durys bolady dep sheshtik. О́ıtkeni memlekettik qyzmetshilerdiń týystary bar. Qandaı da bir múlik durys rásimdelmegen shyǵar. Munyń bárin 2025 jyly anyqtaımyz. Jalpy, jaǵdaı belgili bolady. Kimde qandaı múlik jazylǵanyn bilemiz», dedi mınıstr.
Onyń aıtýynsha, múlikti rásimdeý derekteri memlekettik qyzmetshilerge de, kásipkerlerge de qatysty birdeı júrgizilmek. Sondaı-aq ol jalpyǵa ortaq delarasııalaý rásimderi úrdisi tolyq jolǵa qoıylǵannan keıin óz múlkin deklarasııalamaıtyn jáne salyq tólemeıtin adamdarǵa tıisti shara qoldanylatynyn jetkizdi.
Aıta keteıik, taıaý kúnderi normatıvtik-quqyqtyq aktiler portalynda jarııalanǵan Úkimet qaýlysynda «Qaıtarylǵan aktıvterdi basqarý jónindegi kompanııa» jaýapkershiligi shekteýli seriktestigi qurylatyny belgili bolǵan edi.
«Jarǵy kapıtalynda memlekettiń júz paıyz qatysýymen «Qaıtarylǵan aktıvterdi basqarý jónindegi kompanııa» jaýapkershiligi shekteýli seriktestigi qurylsyn. «Zańsyz ıemdenilgen aktıvterdi memleketke qaıtarý týraly» zańda jáne Qazaqstan Respýblıkasynyń basqa da zańdarynda, normatıvtik quqyqtyq aktilerinde belgilengen tártippen qaıtarylǵan aktıvterdi basqarý, saqtalýyn qamtamasyz etý, ótkizý seriktestiktiń negizgi maqsattary bolyp aıqyndalsyn. Seriktestiktiń jarǵylyq kapıtaly osy qaýlyǵa qosymshaǵa sáıkes Qarjy mınıstrliginiń memlekettik múlik jáne jekeshelendirý komıtetiniń teńgerimindegi múlikti berý jolymen qalyptastyrylsyn», delingen ashyq qaýlyda.
Basqarýshy kompanııanyń mindetteri – memleketke qaıtarylǵan aktıvterdi onyń atynan menshigine qabyldaý, memleket kirisine aınaldyrylǵan aktıvterdiń saqtalýyn jáne ustalýyn qamtamasyz etý, aktıvterge bılik etý, aktıvterdi ótkizýden túsken qarajatty arnaýly memlekettik qorǵa aýdarýdy qamtamasyz etý.